"ჩვენებებში დასახელებულია 3-4 პოლიციელი, ვინც მოზარდს ემუქრებოდა"

პოლიტიკა - 12:41, 18 Dec, 2019

1674

15 წლის ლუკა სირაძის საქმეში, გარდა უკვე დაკავებული გამომძიებელისა, ფიგურირებს 3-4 პოლიციელი, ვინც ასევე ემუქრებოდა მოზარდს- ინფორმაციას "საია" ავრცელებს.

იურისტი რევაზ აჭარაძე, რომელიც სირაძის ოჯახის ინტერესებს იცავს, ნეტგაზეთთან ამბობს, რომ მხოლოდ ჩოლოიანის დაკავება საკმარისი არ არის და გამოძიება გაგრძელდეს.

“განყოფილებაში გამოკითხვას აწარმოებდა მარიანა ჩოლოიანი, რომელიც შემდგომ დააკავეს. ეს იყო ის ადამიანი, ვინც მოზარდს ეუბნებოდა, რომ მას სასწვლებლებში პრობლემები შეექმნებოდა და „თუ არ აღირებ მძიმედ დაისჯები“ – ასეთი ტექსტები და მუქარები მოდიოდა ამ პირისგან. ასევე, როგორც ირკვევა, ირგვლივ იყო 3-4 პოლიციელი, ეს ჩანს ბავშვის დედის ჩვენებებიდან და ასევე საქმის მასალებიდან. ასევე იყო „გვერდზე გაყვანის“ ფაქტიც. განყოფილების უფროსის მოადგილე იყო ის, ვინც მოზარდი რამდენიმე წუთით „გვერდზე გაიყვანა“, – ამბობს ნეტგაზეთთან იურისტი.

რევაზ აჭარიძე განმარტავს, რომ ჩოლოიანი და ის ადამიანი, ვინც შემდგომ ლუკა სირაძე „გვერდზე გაიყვანა“ ნამდვილად ორი სხვადასხვა პირია „უბრალოდ, ამ ეტაპისთვის ცალსახად გამოკვეთილი და იდენტიფიცირებულია, რომ მარიანა ჩოლოიანი ახორციელებდა ამ ქმედებას [ზეწოლას]“.

აჭარიძე დასძენს, რომ გამოძიებამ ახლა უნდა დაადგინოს, ვინ იყვნენ ის დანარჩენი პოლიციელები, ვინც, როგორც დედის ჩვენებიდან იკვეთება, ასევე ემუქრებოდა მოზარდს.

“უნდა დადგინდეს, ვინ იყო კომუნიკაციაში შესული უშუალოდ ამ ტექსტებითა და მუქარით. ამიტომ, მარტო ის, რომ ჩოლოიანი არის ამ ეტაპისთვის ბრალდებული, ჩვენი შეხედულებით საკმარისი არ არის. იმედია, მალე სხვა პირებიც იქნებიან იდენტიფიცირებულნი,“ – აცხადებს ადვოკატი და ამატებს, რომ ამ ეტაპისთვის გამოძიება ადეკვატურად და კომპლექსურად მიმდინარეობს.