შინაგან საქმეთა სამინისტრო მორიგ სკანდალში ეხვევა. გომელაურის უწყებამ, რომელიც 15 წლის ლუკა სირაძეზე პოლიციელთა მხრიდან ზეწოლას გამორიცხავდა, გუშინ, მოზარდის გარდაცვალების შემდეგ დიდუბე-ჩუღურეთის პოლიციის განყოფილების გამომძიებელი მარინა ჩოლოიანი დააკავა.

დიდუბე-ჩუღურეთის პოლიციის განყოფილების ერთადერთ დაკავებულ გამომძიებელს ბრალად სს კოდექსის 335-ე მუხლი წაუყენეს, რაც ჩვენების მიცემის იძულებას გულისხმობს.

ოპოზიციისა და საზოგადოების წარმომადგენლები შს მინისტრისა და მისი მოდგილის ნინო ცაციაშვილის გადადგომას მოითხოვენ.

სწორედ ცაციაშვილი იყო ის მაღალჩინოსანი, რომელიც ირწმუნებოდა, რომ ზეწოლას ადგილი არ ჰქონია.

„საზოგადობაში ვრცელდება მხოლოდ ცრუ ინფორმაცია, რომ ზეწოლის შედეგად იქნა მიღებული აღიარებითი ინფორმაცია“ - აცხადებდა გასულ კვირას ცაციაშვილი.

სახელმწიფო ინსპექტორმა ლონდა თოლორაიამ კი გუშინ თქვა, რომ მარიამ ჩოლოიანი სწორედ სისხლის სამართლის კოდექსის 335-ე მუხლის პირველი ნაწილის გათვალისწინებული დანაშაულით დააკავეს.