საოკუპაციო რეჟიმის მიერ დაკავებული ექიმის, ვაჟა გაფრინდაშვილის ოჯახის წევრები და მოქალაქეები დღეს პირველი რესპუბლიკის მოედანზე შეიკრიბებიან და ავტომანქანებით საოკუპაციო ხაზამდე მსვლელობას მოაწყობენ.

ექიმის შვილმა ირინა გაფრინდაშვილმა, აქციასთან დაკავშირებით სოციალურ ქსელში პოსტი დაწერა და საზოგადოებას მადლობა გადაუხადა მხარდაჭერისთვის.

"როგორც შეგვატყობინეს რესპუბლიკის მოედანი დაიკეტება ამაღამ, ამიტომ ყველა ვინც მანქანით აპირებთ მოსვლას ელბაქიძის დაღმართზე, სამაიას ბაღთან შევიკრიბოთ!

მეგობრებო, ვაჟა ექიმის გულშემატკივრებო! პირველ რიგში დიდი მადლობა ამხელა სიყვარულისთვის და მხარდაჭერისთვის.
იმედი მაქვს ხვალ ძალიან ბევრი ვიქნებით. გვინდა შეგატყობინოთ ხვალინდელი აქციის რამდენიმე მნიშვნელოვანი დეტალი:
ვიკრიბებით 11 საათზე რესპუბლიკის მოედნის მიმდებარე ტერიტორიაზე და 11.30-12:00 ოკუპაციის ხაზისკენ (სოფელი ოძისი) გაემართება მანქანების მარში.
შეკრება მოხდება მაქსიმალურად უსაფრთხო ადგილას, ყოველგვარი პროვოკაციისგან თავის დასაზღვევად.
აქცია იქნება მდუმარე, მხოლოდ ოჯახი გავაკეთებთ მცირე მიმართვას.

ჩვენ იმედი გვაქვს, რომ ერთობლივი ძალისხმევით ვაჟა ექიმი უახლოეს მომავალში სახლში იქნება და მალე გააგრძელებს საკუთარ საქმიანობას თითოეული ჩვენგანის ჯანმრთელობისთვის" – წერს ირინა გაფრინდაშვილი .