თიბისის და თბილისის საკრებულოს ინიციატივით, ვარკეთილში 1 300 კედრის მარადმწვანე ხე დაირგა.

თიბისის მიერ ქალაქისთვის შეძენილი ხეებით თაყაიშვილისა და ალექსიძის ქუჩების 2 კმ-იანი მონაკვეთი გამწვანდება. გამწვანების აქცია დღეს გაიმართა და მასში მონაწილეობა თბილისის მერმა - კახა კალაძემ, საკრებულოს თავმჯდომარემ - გიორგი ტყემალაძემ, თიბისი ბანკის გენერალურმა დირექტორმა- ვახტანგ ბუცხრიკიძემ და საკრებულოს წევრებმა მიიღეს.

1 300 ხის დარგვა ერთადერთი ინიციატივა არ არის, რომელსაც თიბისი მწვანე საფარის გაშენების მიმართულებით ახორციელებს. ბანკის ინიციატივით, ბორჯომში 2017 წელს გაჩენილი ხანძრის შედეგად გადამწვარი ტყის აღსადგენად, 17 500 კავკასიური ფიჭვი დაირგო. შედეგად, ბორჯომის ტყის დაზიანებული საფარის 10 ჰექტარი აღდგება.

გარდა ამისა, თიბისის მიზანია კომპანიის აქტივობები ეკომეგობრული გახადოს და შეამციროს გარემოზე ნეგატიური ზემოქმედება. ამ მიზნის მისაღწევად, ბანკში უკვე არაერთი ინიციატივა ხორციელდება.

დაიწყო თიბისის ავტოპარკის ეტაპობრივად ეკო მანქანებით ჩანაცვლება. ამჟამად ავტოპარკი 59 ჰიბრიდულ და 14 ელექტრო-მანქანას აერთიანებს. ინიციატივის ფარგლებში, თიბისიმ საგრძნლობლად შეამცირა საწვავის მოხმარება.

თიბისის ახალი სათავო ოფისი, რომლის მშენებლობა ლისის ტბის მიმდებარე ტერიტორიაზე უკვე მიმდინარეობს, 80/20 კონცეფციას ეფუძნება, რაც იმას ნიშნავს, რომ ტერიტორიის მხოლოდ 20%-ზე განხორციელდება მშენებლობა, 80% -კი გამწვანებასა და რეკრეაციული ზონების მოწყობას დაეთმობა;

თიბისიში უკვე დაიწყო ნარჩენების დახარისხება, პლასტმასის ჭიქების ქაღალდის ჭიქებით ჩანაცვლება, მაკულატურის გადამუშავებით წიგნების დამზადება. კომპანია ხელს უწყობს თანამშრომლების ცნობიერების ამაღლებასაც;

ბანკი ზრუნავს გარემოზე არა მხოლოდ პირდაპირი ნეგატიური გავლენის შემცირების მიმართულებით, არამედ - ირიბისაც, რაც მომხმარებლების გარემოსდაცვითი და სოციალური რისკების მართვას და მათი ცნობიერების ამაღლების ხელშეწყობას გულისხმობს.

თიბისი მომავალშიც გეგმავს გარემოსდაცვითი მიმართულებით სხვადასხვა ინიციატივისა და პროექტის განხორციელებას.