ივანიშვილის გამდიდრების საქმის გამოსაძიებლად ლარნაკაში გაფრენა ვერ შედგა - რატომ დაესხნენ თავს ოპოზიციის ლიდერებს აეროპორტში

პოლიტიკა - 17:51, 11 Dec, 2019

973

ივანიშვილის გამდიდრების საქმის გამოსაძიებლად, ლარნაკაში მიმავალი ოპოზიციის ლიდერებს უცნობი პირები თავს დაესხნენ და ფიზიკურად გაუსწორდნენ. ინფორმაცია, რომ საზღვარგარეთ ვიზიტი, სწორედ "ქართული ოცნების" ლიდერის 90 -იან წლებში საქმიანობას უკავშირდებოდა, ჟურნალისტებთან დაადასტურეს ევროპული საქართველოს წევრებმა გიგი უგულავამ და გოკა გაბაშვილმა, რომლებმაც შსს-ს შენობა რამდენიმე წუთის წინ დატოვეს.

"რამდენიმე შეხვედრა გვქონდა, რომელიც ეხება 90-იან წლებში ივანიშვილის "საგმირო საქმეებს", როცა იყო რუსეთში. საუბარია შეკვეთილ მკვლელობებზე, ფულის გათეთრებაზე და იმ მტკიცებულებებზე, რომელიც სხვადასხვა ადამიანებს აქვთ. ამას უნდა გავცნობოდით, როგორც ჩანს, ივანიშვილმა გაიგო და მოაწყვეს ეს სამასხარაო ჩხუბი. ეს კიდევ უფრო მიღრმავებს ეჭვს, რომ საბუთები, რომელიც უნდა მენახა, ღირს ნახვად, რადგან ამხელა ოპერაცია დადგეს იმისთვის, რომ არ წავსულიყავით. წყალზე ბრალდებები არ მიყვარს, თუ იქნება ვალიდური საბუთები, იმას საზოგადოება აუცილებლად ნახავს" - ამბობს უგულავა.

რაც შეეხება უაშუალოდ თბილისის აეროპორტში მომხდარ ფაქტს, უგულავა ამბობს, რომ შსს-ს ამ დრომდე არ გაუცია პასუხი, ვინ იყვნენ თავდამსხმელები.

"ხუთი საათი ვიყავით დაკითხვაზე, აქედან ორი საათი სრულიად ტყუილად. ვერ გავიგეთ ვინ არიან თავდამსხმელები, პოლიციამ არ გვითხრა მათი სახელები და გვარები. ეს ამყარებს ეჭვს, რომ ყველაფერი იყო დადგმული, რადგან თავდასხმა მოხდა აეროპორტის ყველაზე დაცულ ზონაში, საპასპორტო კონტროლის მიღმა. ნაცნობ ქალბატონთან ერთად ვსვამდით ყავას და ვსაუბრობდით, როდესაც მოვიდა ვიღაც მუტრუკი და დაიწყო კლასიკური ტექსტები, რასაც ვისმენთ ხოლმე ამათი ორკებისგან და ტიტუშკებისგან. მალე მოვიდა მეორე კუნთიანი და დაიწყო ჩხუბი, რამდენიმე წუთში პოლიციამ წაიყვანა ისინი და აღარც სახელს გვეუბნებიან და აღარც გვარს.

არ გვაქვს ილუზია, რომ რამე სერიოზული გამოძიება ჩატარდება, პირდაპირ გვითხრა გამომძიებელმა, რომ ეს არის მსუბუქი მუხლი და კამერის ჩანაწერების ამოღების უფლება არ აქვთ თურმე, რაკი მსუბუქია, ამასაც არ აპირებენ. მეც და გოკამაც ვთქვით ექსპერტიზაზე უარი, რადგან აბსოლუტურად დროის ფუჭ კარგვად მიგვაჩნია" - თქვა გიგი უგულავამ.

თავდასხმის ფაქტზე შინაგან საქმეთა სამინისტრომ გამოძიება 126-ე, ძალადობის მუხლით დაიწყო.

შენიშვნა: პირველი არხის ფოტო.