„თქვენ ცდებით, ეს ასე არ არის“ - ლავროვის მოადგილის ცინიზმი ვაჟა გაფრინდაშვილის საკითხზე

პოლიტიკა - 10:40, 11 Dec, 2019

1049

ჟენევაში დღეს საერთაშორისო მოლაპარაკებების 50-ე რაუნდი გაიმართება.

მოლაპარაკებების მთავარი განხილვის თემა საოკუპაციო რეჟიმის მიერ დაკავებული ექიმის ვაჟა გაფრინდაშვილის პატიმრობიდან გათავისუფლების საკითხი იქნება.

გუშინ მხარეებმა ტექნიკური საკითხები განიხილეს.

როგორც საგარეო საქმეთა მინისტრის მოადგილე ლაშა დარსალია აცხადებს, ჟენევა ერთ-ერთი საერთაშორისო ფორმატია, სადაც თანათავმჯდომარეების დახმარებით შესაძლებელია რუსეთზე ზეწოლის გაძლიერება.

რუსეთს საგარეო საქმეთა მინისტრის მოადგილე ამბობს, რომ გაფრინდაშვილის საკითხი განიხილება, თუმცა რუდენკო აცხადებს, რომ ექიმი რუსეთის ტერიტორიაზე არ იმყოფება, ამიტომ მას მომხდართან დაკავშირებით ინფორმაცია არ აქვს. „თქვენ ცდებით, ეს ასე არ არის“ - ამბობს რუდენკო ჟურნალისტების პასუხად, რომლებმაც აღნიშნეს, რომ ოკუპირებული ცხინვალის რეგიონი სწოედ რუსეთის კონტროლქვეშაა.

„ეს საკითხი განიხილება ამ შეხვედრაზე და ქართულ მხარეს შეუძლია, დასვას შეკითხვები და მიიღოს პასუხები. გაფრინდაშვილს ოჯახს კი ვეტყვი, რომ იმედი გვაქვს, რომ ყველაფერი ნორმალურად იქნება და ის თავის ოჯახს დაუბრუნდება“, – განაცხადა ანდრეი რუდენკომ.

თავის მხრივ, ვაჟა გაფრინდაშვილის ოჯახი რადიკალური ზომების მიღებას არ გამორიცხავს და საპროტესტო აქციებისთვის ემზადება.