ისრაელში საქართველოსა და ისრაელის სოფლის მეურნეობის მინისტრების შეხვერდა გაიმართა

ბიზნესი & ეკონომიკა - 12:34, 25 Oct, 2013

1911

21-25 ოქტომბერს საქართველოს სოფლის მეურნეობის სამინისტროს დელეგაცია, სოფლის მეურნეობის მინისტრის, შალვა ფიფიას ხელმძღვანელობით, ოფიციალური ვიზიტით ისრაელში იმყოფებოდა.

ვიზიტის ფარგლებში, საქართველოს სოფლის მეურნეობის მინისტრი შალვა ფიფია ისრაელის სოფლის მეურნეობის მინისტრს, იაირ შამირს შეხვდა. შალვა ფიფიამ დეტალურად ისაუბრა საქართველოს სოფლის მეურნეობის სამინისტროში მიმდინარე და განხორციელებულ პროექტებზე, ასევე იმ სიახლეებზე, რომლებიც დარგის განვითარების მიმართულებით ხორციელდება, მათ შორის, საქართველოში კოოპერაციების შექმნისკენ გადადგმულ ნაბიჯებზე. შეხვედრაზე განსაკუთრებული ყურადღება დაეთმო საქართველოს მუნიციპალიტეტებში რაიონული საინფორმაციო-საკონსულტაციო სამსახურების შექმნისა და ფუნქციონირების საკითხს. აღნიშნული სამსახურები ხელს უწყობს ადგილობრივი ფერმერების ინფორმირებულობის გაზრდას და მათ საქმიანობის ეფექტიანობის ამაღლებას.

ისრაელის სოფლის მეურნეობის მინისტრმა დადებითად შეაფასა საქართველოს ხელისუფლების მიერ სოფლის მეურნეობის დარგის განვითარებისთვის გადადგმული ნაბიჯები და მომავალი თანამშრომლობისთვის მზადყოფნა გამოთქვა.

„მისასალმებელია ისრაელის სახელმწიფოს მხრიდან დარგის განვითრების მხარდაჭერა, რადგან მათ სოფლის მეურნეობის სხვადასხვა სექტორში წარმატებული პროექტების განხორციელების დიდი გამოცდილება აქვთ, განსაკუთრებით, თანამედროვე სასათბურე მეურნეობებისა და უახლესი ტექნოლოგიების დანერგვის მიმართულებით. მოხარულები ვიქნებით, აქტიურად ვითანამშრომლოთ ერთობლივი პროექტების განხორციელების მიზნით“, - განაცხადა შეხვედრის დასრულების შემდეგ შალვა ფიფიამ.

ისრაელში ოფიციალური ვიზიტის ფარგლებში შალვა ფიფია სოფლის მეურნეობის საერთაშორისო განვითარების ხელშეწყობის ცენტრის (CINADCO) ხელმძღვანელს, ომარ ზიდანსაც შეხვდა, რომელმაც საქართველოში საინფორმაციო-საკონსულტაციო სამსახურების თანამშრომელთა კვალიფიკაციის ამაღლების, ასევე, ქართველი ფერმერებისა და კოოპერატივების შექმნის მსურველთათვის ისრაელის სახელმწიფოს გამოცდილების გაზიარების მიმართულებით ერთობლივი პროექტების განახორციელების სურვილი გამოთქვა.