"ნუ წაახალისებთ პროცესებს, რომელიც ქვეყანას ძვირად დაუჯდება"- ჩუგოშვილი ხელისუფლებას აფრთხილებს

პოლიტიკა - 15:49, 10 Dec, 2019

641

პარლამენტის ყოფილმა ვიცე-სპიკერმა თამარ ჩუგოშვილმა ყოფილი თანაგუნდელები ღიად გააკრიტიკა და პარლამენტის ტრიბუნიდან თქვა, რომ "ის, რაც შედის პარტიის პრაგმატულ ინტერესში, აღარ შედის ქვეყნის ინტერესში".

უმრავლესობიდან წამოსულმა ჩუგოშვილმა ივანიშვილის გუნდს ოპოზიციასთან დიალოგისკენ მოუწოდა და თქვა, რომ პროცესები ხელოვნურად არის დაძაბული.

"არ ვიზიარებ და არ ვეთანხმები და არ მომწონს ის უკანონო გზები, რომელსაც რიგ შემთხვევაში ოპოზიცია იყენებს პროტესტის გამოსახატავად, თუმცა, უფრო მეტად მეშინია იმ ხელოვნური დაპირისპირებების, რომელიც ბოლო პერიოდში ორგანიზდება და იმ ხელოვნური პროცესების, რომლის შედეგადაც ერთმანეთზე შეჯახება ხდება ჩვენი ქვეყნის მოქალაქეების, ახალგაზრდების, პარტიების მხარდამჭერების. ეს არის ძალიან საშიში პროცესი და მინდა გთხოვოთ, რომ იმ გადაწყვეტილებების გამო, რომელიც მიიღო საქართველოს პარლამენტმა, ნუ წაახალისებთ პროცესებს, რომელიც შეიძლება ქვეყანას დაუჯდეს ძალიან ძვირად და ნაცვლად ფიზიკური დაპირისპირებისა და ნაცვლად მუშტიკრივისა, გთხოვთ პოლიტიკურად სცადოთ პოლიტიკური პრობლემების მოგვარება. პოლიტიკური გზა კი არის მხოლოდ და მხოლოდ დიალოგი, კომპრომისები და დათმობა. დგება ხოლმე პერიოდი, განსაკუთრებით მმართველი ძალებისთვის, როდესაც ის, რაც შედის პარტიის პრაგმატულ ინტერესში, აღარ შედის ქვეყნის ინტერესში და ყველაზე მნიშვენლოვანი არის, თუ როგორ მოიქცევა ადამიანი, მაშინ როდესაც ეს მომენტი დგება: რაც პრაგმატულად აწყობს პარტიას, აღარ აწყობს ქვეყანას. ყველაზე მნიშვნელოვანი არის, თუ რა გადაწყვეტილებას მიიღებს მმართველი პარტია ამ დროს. ზუსტად შემიძლია გითხრათ, ჩალის ფასიც არ აქვს თანამდებობას თუ შენი პოზიცია ქვეყნის ინტერესებს არ შეესაბამება და არ ემსახურება. ამიტომ ძალიან გთხოვთ, მინდა მქონდეს იმედი, რომ ჯერ კიდევ არის რესურსი დარჩენილი იმისთვის, რომ დაპირისპირებების, ფიზიკური შეჯახებების ნაცვლად დიალოგით, შეთანხმებით და დათმობით მოხდეს ქვეყნის დაწყნარება, დამშვიდება და ეს უპირველად „ქართული ოცნების“ პასუხისმგებლობა"- მიმართა ჩუგოშვილმა ხელისუფლებას.

თამარ ჩუგოშვილი ასევე გამოეხმაურა ქვეყნაში შექმნილ პროცესებს.

„1 თვის წინ, როდესაც პირველად გაჩნდა ნიშნები, რომ შეიძლებოდა ეს კენჭისყრა ჩავარდნილიყო და ეს ცვლილება არ ყოფილიყო მიღებული, ჩვენ გეუბნებოდით, რამდენიმე რამეს - ჩვენ ვამბობდით, რომ ეს ჩაგდება გამოიწვევდა ძლივს კალაპოტში ჩაყენებული პოლიტიკური პროცესების ქუჩაში გადასროლას. გამოიწვევდა უკიდურესად გამწვავებას პროცესების, გეუბნებოდით, რომ უმრავლესობის ეს გადაწყვეტილება გამოიწვევდა საქართველოს მმართველი გუნდის ხელისუფლების მიმართ ნდობის განადგურებას, როგორც ქვეყნის შიგნით, ასევე განსაკუთრებით ჩვენი პარტნიორების მხრიდან და უნდა შეგახსნოთ პარტნიორების ნდობა ჩვენნაირი პატარა ქვეყნისთვის სასიცოცხლოდ მნიშვნელოვანია. ეს არ არის ხელწამოსაკრავი რამ, ჩვენ მათზე ვართ ხშირად დამოკიდებულები. ის სისტემა, რომელიც ჩვენ ქვეყანაში გვქვს არის უსამართლო, ეს სისტემა უზრუნველყოფს მარტივ რამეს: მოსახლეობის ნახევარზე ნაკლების მხარდაჭერით, ის აბსოლუტურ ძალაუფლებას აძლევს ერთ პოლიტიკურ ძალას და შესაბამისად, ყველა გადაწყვეტილების უკან, რომელიც ქვეყანაში მიიღება არ დგას მოსახლეობის ნახევარზე მეტი, სწორედ ამიტომ იყო მნიშვნელოვანი და დღესაც მნიშვნელოვანია, რომ მმართველმა ძალამ გაიაზროს რომ სისტემა, რომელზეც წლების განმავლობაში ვიძახდით რომ სტაბილურობითვის იყო საჭირო, სტაბილურობას კი არ უზრუნველყოფს, უზრუნველყოფს ქუჩას, დესტაბილიზაციას და პოლიტიკურ კრიზისებს“ , - განაცხადა თამარ ჩუგოშვილმა.