თბილისის მერი კახა კალაძე ევროპარლამენტარების კრიტიკულ შეფასებას ეხმაურება.

მისი თქმით, 20 ივნისის საქმეზე გადაცდენა არავის უნდა ეპატიოს და გამოხატვის თავისუფლება ყველა ადამიანს უნდა ჰქონდეს.

"20 ივნისს რაც მოხდა, არის ძალიან ცუდი. თუმცა, კიდევ ერთხელ ვიმეორებ, არავის არ უნდა ეპატიოს გასცდეს კანონის ჩარჩოებს, კანონის ფარგლებს. მე ძალიან ბევრჯერ მითქვამს და კიდევ ერთხელ გავიმეორებ, ყველა ადამიანს აქვს გამოხატვის თავიანთი შეხედულებები. სიტყვისა და გამოხატვის თავისუფლება ჩვენს ქვეყანაში დაცულია. ამასთან დაკავშირებით წლების წინ იყო პრობლემები და ამას ებრძოდა სრულიად საქართველო, დღეს ჩვენ გვაქვს განსხვავებული რეალობა, განსხვავებული მდგომარეობა, ყველა ადამიანს აქვს სიტყვისა და გამოხატვის თავისუფლება, თუმცა მთავარია ეს ყველაფერი იყოს კანონის ფარგლებში. პოლიტპატიმრები საქართველოში იყვნენ რა თქმა უნდა, ეს იყო 2012 წლამდე, დღეს პოლიტპატიმრები საქართველოში არ არსებობენ" - აღნიშნა კალაძემ.