ხელისუფლების ბრძოლა მედიაბაზრის ხელში ჩასაგდებად: ნიკა გვარამია Kantar Media-ს სქემის და უფლებამოსილების სისტემის საჯაროობას ითხოვს

პოლიტიკა - 20:45, 09 Dec, 2019

1026

სატელევიზიო რეიტინგების ბაზარზე არსებულ ვითარებას ეხმაურება ტელეკომპანია „მთავარის“ გენერალური დირექტორი. ნიკა გვარამიას Kantar Media-სთან დაკავშირებით კითხვები აქვს და ამბობს, რომ მას შემდეგ რაც ტვ იმედის საკუთრებაში მყოფმა აღნიშნულმა კომპანიამ ხელისუფლების ხელშეწყობით AGB Nielsen-ი ჩაანაცვლა, თუ არ მოხდება Kantar Media-ს უფლებამოსილების სისტემის საჯარო განხილვაზე გამოტანა და არ იქნება გათვალისწინებული ყველა ბარიერი გაყალბების შესაძლებლობის გასანეიტრალებად, ის უარს აცხადებს Kantar Media-სთან თანამშრომლობაზე და მსგავსი გადაწყვეტილებისკენ მოუწოდებს ყველა ტელევიზიას და სარეკლამო სააგენტოს.

„მოკლედ, ხელისუფლებამ ვერაფერი რომ ვერ მოახერხა, ბოლობოლო, სატელევიზიო რეიტინგის ერთადერთი ვალიდური გამზომი AGB Nielsen კომერციულად ჩამოანგრია და აიძულა, გავიდეს ბაზრიდან. იანვრიდან ბაზარზე რჩება ერთადერთი გამზომი, ტელეკომპანია იმედის რეალურ საკუთრებაში მყოფი კანტარ მედია.

იმ ვითარებაში, თუ

ახალი გამზომის კორპორაციული სქემა და უფლებამოსილებების სისტემა არ იქნება გამოტანილი ღია საჯარო განხილვაზე;

არ იქნება გათვალისწინებული ყველა გონივრული ფილტრი და ბარიერი რეიტინგების გაყალბების შესაძლებლობის გასანეიტრალებლად;

და ეს გადაწყვეტილებები არ იქნება მიღებული ყველა ტელევზიის, სარეკლამო სააგენტოს და, ასევე, ყველა წონადი არასამთავრობო ორგანიზაციის მონაწილეობით, და მომავალში ფუნქციონირებას არ გააგრძელებს მათივე მკაცრი მეთვალყურეობის ქვეშ,

ჩვენ უარს ვაცხადებთ კანტარ მედიასთან თანამშრომლობაზე და ამისკენ მოვუწოდებთ ყველა ტელევიზიას და სარეკლამო სააგენტოს“ - წერს ნიკა გვარამია.

ცნობისათვის, სატელევიზიო აუდიტორიის გამზომი კომპანიების დამკვეთები არიან ტელევიზიები, სარეკლამო სააგენტოები და მედიასელერები, რომლებსაც რეიტინგების გაზომვა პროგრამირებისთვის და რეკლამის მოსაზიდად სჭირდებათ. სარეკლამო სააგენტოები და მედიასელერები რეკლამის განთავსებას კი სწორედ სატელევიზიო რეიტინგების მიხედვით ახდენენ.