ცხინვალის საოკუპაციო რეჟიმის მიერ დაკავებული ექიმის, ვაჟა გაფრინდაშვილის ე.წ. სასამართლო პროცესი, სავარაუდოდ, პარასკევს, 13 დეკემბერს გაიმართება.

ინფორმაცია მედიას საქართველოს ადვოკატთა ასოციაციის ხელმძღვანელმა, დავით ასათიანმა მიაწოდა.

„ცხინვალის ე.წ. სასამართლოს პროგნოზირება ახლა აბსოლუტურად წარმოუდგენელია, რადგან მთელი საერთაშორისო სამართლიდან ამოვარდნილია და ყველა ეს პროცედურა უკანონოა, თუმცა ადვოკატი ჩვენთან კომუნიკაციაშია. როგორც ვიცით, ამ კვირაში სასამართლო პროცესია ჩანიშნული. სხდომა სავარაუდოდ კვირის ბოლოს, პარასკევს გაიმართება. ჩვენი მხრიდან მაქსიმალურს ვაკეთებთ, რომ ექიმი ვაჟა გაფრინდაშვილი რაც შეიძლება მალე გათავისუფლდეს“ ,- თქვა ასათიანმა.

ექიმი ვაჟა გაფრინდაშვილი უკვე ერთი თვეა, ცხინვალის იზოლატორში პატიმრობაში იმყოფება.