ხვალ ბათუმის სახელმწიფო საზღვაო აკადემიის პირველკურსელები, საზეიმო ვითარებაში მეზღვაურთა ფიცს დადებენ

პოლიტიკა - 19:23, 09 Dec, 2019

2187

10 დეკემბერს, ბათუმის სახელმწიფო საზღვაო აკადემიის პირველკურსელები, საზეიმო ვითარებაში მეზღვაურთა ფიცს დადებენ.

ფიცის დადების ტრადიცია აკადემიაში უკვე მეოთხე წელია არსებობს. სტუდენტები იღებენ ფიცს, რომ პირნათლად დაკეთილსინდისიერად შეისწავლიან საზღვაო საქმეს,

ღირსეულად გააგრძელებენ აკადემიის ტრადიციებს და

გაუფრთხილდებიან მეზღვაურის პროფესიულ ღირსებას.

ამ დღესვე, ბათუმის სახელმწიფო საზღვაო აკადემიაში გაიმართება მემორანდუმზე ხელის მოწერის ცერემონია, აჭარის მთავრობას, აჭარის განათლების, კულტურისა და სპორტის სამინისტროს, საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოსა და ბათუმის სახელმწიფო საზღვაო აკადემიას შორის.

მემორანდუმის მიზანია მეზღვაურთა განათლების ხელშემწყობი ღონისძიებების გატარება საზღვაო აკადემიის სტუდენტებისთვის გემებზე საზღვაო პრაქტიკის უზრუნველყოფის გზით.

2020 წლიდან საზღვაო აკადემიის ყველა კურსდამთავრებული შეძლებს გაიაროს სწავლების შემდგომი საერთაშორისო სტანდარტების შესაბამისი საზღვაო წვრთნა.

არსებული მდგომარეობით საზღვაო პრაქტიკის სავალდებულო ნაწილს სასწავლებლები უზრუნველყოფენ, მაგრამ იმისათვის, რომ სტუდენტებმა გაცილებით უფრო სწრაფად მოახერხონ ოფიცრის პოზიციის დაკავება საჭიროა დამატებით 6 თვიანი პროფესიული პრაქტიკა საერთაშორისო ნაოსნობაში. სწორედ აღნიშნულ წვრთნას დააფინანსებს საზღვაო ტრანსპორტის სააგენტო და აჭარის ა.რ. მთავრობა.

დღეს საქართველო იკავებს მე-13 ადგილს მსოფლიო სახელმწიფოებს შორის ევროკავშირის გემებზე ოფიცერთა შემადგენლობის მიწოდების კუთხით. ქართველ მეზღვაურებს გააჩნიათ ზღვაოსნობისთვის საჭირო უნარები და კვალიფიკაცია მაღალი პოზიციების დასაკავებლად. შესაბამისად სახელმწიფო ერთი მხრივ, მხარს უჭერს საზღვაო განათლების გაძლიერებას, და მეორე მხრივ, ხელს უწყობს მეზღვაურებს სწავლების შემდგომ წარმატებით დასაქმებაში.