"ქართული ოცნების" წევრის ირაკლი კობახიძის თქმით, მოსამართლეობის სიას ოთხშაბათს, საკომიტეტო სხდომაზე განიხილავენ.

მისივე თქმით, ოპოზიცია მუდმივად დესტრუქციაში ჩარჩენილი და სწორედ ამის გამო აკრიტიკებს სასამართლო სისტემაში არსებულ ყველა რეფორმას.

"სურათი ისე არის ჩამოყალიბებული, რომ უზენაესი სასამართლოს მოსამართლეთა ოცივე კანდიდატი არც ერთ შემთხვევაში არ დამტკიცდება. რამდენი იქნება და ვინ იქნება, ეს უკვე ოთხშაბათისთვის გაირკვევა. საკომიტეტო სხდომა შედგება, ამის შემდეგ კი პლენარულ სხდომაზე განვიხილავთ მოსამართლეების საკითხს და უნდა მივიღოთ ისეთი გადაწყვეტილება, რომელიც ყველაზე მეტად წაადგება სასამართლო სისტემის სათანადო განვითარებას. ეს არის ჩვენი პოზიცია. ოპოზიცია მუდმივად დესტრუქციაშია დარჩენილი. არ ვიცი, ამით რას მიაღწევენ. ვერაფერსაც მიაღწევენ. რეალურად, ჩვენ ვართ კონსტრუქციულ რეჟიმში და ორიენტირებული იმაზე, რომ ინსტიტუტები ამ ქვეყანაში განვითარდეს. იცით, 2012 წლის შემდეგ როგორ პროგრესს მიაღწია ჩვენმა ქვეყანამ დემოკრატიული ინსტიტუტების განვითარების თვალსაზრისით, მათ შორის სასამართლოს ნაწილში" - აღნიშნა კობახიძემ.