„რუსეთის კულტურის ცენტრი - ახალი საოკუპაციო ბაზა თბილისში“

„რუსეთის კულტურის ცენტრი - ახალი საოკუპაციო ბაზა თბილისში“ - კონფერენცია "რუმსში"

პოლიტიკა - 12:12, 09 Dec, 2019

1359

მოქალაქეთა, პოლიტიკოსთა, არტისტთა და ექსპერტთა, ასევე ქართული მართლმადიდებლური ეკლესიის სინოდის წევრთა საინიციატივო ჯგუფის ინიციატივით "თბილისი რუმსში" 12:00 საათზე კონფერენცია „რუსეთის კულტურის ცენტრი - ახალი საოკუპაციო ბაზა თბილისში“ დაიწყო.
პირველ მომხსენებლად კონფერენციაზე წარსდგა მარგვეთისა და უბისის ეპისკოპოსი მეუფე მელქისედეკი, რომელმაც გამოსვლის დასაწყისში აღნიშნა, რომ მხარს უჭერს ექიმ ვაჟა გაფრინდაშვილის დაუყოვნებლივ გათავისუფლების მოთხოვნას და სიმტკიცეს უსურვებს თავად უკანონოდ გატაცებულ ექიმსა და მისი ოჯახის წევრებს.
კონფერენციაზე მოხსნებლებად წარსდგებიან ასევე: ეროვნული უსაფრთხოების თემებზე ირაკლი მენაღარიშვილი, დავით სიხარულიძე, ბათუ ქუთელია, ნიკა გვარამია, ნინო ევგენიძე და ბეჟან ჯავახია, ხოლო სამოქალაქო წინააღმდეგობის თემაზე ისაუბრებენ გიგი თევაძე, ნუგზარ წიკლაური. შოთა დიღმელაშვილი, გია როინიშვილი, ნათია კობერიძე, ლაშა ბუღაძე, გიორგი მელაძე.
კონფერენციას ესწრება ანტიოკუპაციური მოძრაობა "ძალა ერთობაშიას" ლიდერი დავით ქაცარავა, რომლის ორგანიზებით უკვე თითქმის 900 დღეა, შიდა ქართლის საოკუპაციო ზოლზე სამოქალაქო პატრულირება უწყვეტ რეჟიმში მიმდინარეობს.
„კონფერენცია გთავაზობთ დისკუსიას საზოგადოების ფართო ფენების მონაწილოებით. დისკუსიაზე განხილული იქნება რუსეთის კულტურის ცენტრის შესაძლო დაფუძნებასთან დაკავშირებული საფრთხეები და ქართული საზოგადოების რეაგირების სტრატეგიები“, - ნათქვამია კონფერენციის პრესპელიზში.
კონფერენციაზე ხელი მოეწერება მანიფესტს რუსეთის კულტურის ცენტრის, იგივე რუსული ჰიბრიდული ომის ანტისახელმწიფოებრივი იარაღის წინააღმდეგ.