ბიძინა ივანიშვილი საქართველოს დაშლას ახალი მეთოდებით გეგმავს, ეს მიუღებელია

ბიძინა ივანიშვილი საქართველოს დაშლას ახალი მეთოდებით გეგმავს, ეს მიუღებელია - გიორგი ვაშაძე

პოლიტიკა - 14:28, 02 Dec, 2019

1126

„ახალი საქართველოს“ ლიდერი გიორგი ვაშაძე, „ქართული ოცნების“ თავმჯდომარის ბიძინა ივანიშვილის სიტყვით გამოსვლას ეხმაურება, რომელიც საქართველოს მოქალაქეების ქვეყნის ფარგლებს გარეთ დასაქმებას შეეხო. გიორგი ვაშაძეს მიაჩნია, რომ ოლიგარქი ბიძინა ივანიშვილი საქართველოს დაშლას ახალი მეთოდებით ცდილობს. მისი თქმით, ემიგრაციაში მყოფი მოქალაქეებისთვის სამუშაო ადგილები ჩვენივე ქვეყანაში უნდა შეიქმნას რათა ისინი საქართველოში დავაბრუნოთ.

„ივანიშვილისგან განსხვავებით, მე ვფიქრობ, რომ საქართველოს ძალიან დიდი პერსპექტივა და მომავალი აქვს. სამუშაო ადგილები აქ შეგვიძლია შევქმნათ და არა ევროპაში, როგორც ის ამბობს. ფაქტობრივად ის გვეუბნება, რომ ოჯახებს - ქვეყნის ფუნდამენტს დავანგრევ და ქვეყანაში მხოლოდ პენსიონერებსა და ახალგაზრდებს დავტოვებ დანარჩენები კი სამუშაოდ უცხოეთში გაიხიკებიან და იქ იმუშავებენო.

მე მსურს ჩვენს ემიგრანტებს მივმართო: ჩვენი ქვეყნის ძვირფასო მოქალაქეებო თქვენც ჩაერთეთ ამ პროცესებში და ხელისუფლებას გამოუცხადეთ, რომ საქართველოში დაბრუნება გსურთ და თქვენი მიზანი არ არის მუდმივად სხვა ქვეყანაში სარჩო - საბადებლად სიარული.

ქვეყნის დნმ არის ოჯახი და ამ სისხლის დნმ-ის დაშლას გვპირდება „ქართული ოცნება“, რადგან გაველურებულ საქართველოში ხელისუფლება სამუდამოდ შეინარჩუნოს და ზოოპარკად აქციოს ეს ქვეყანა, რასაც მე ვერ შევეგუები. ჩვენ აუცილებლად დავასრულებთ ამ ხელისუფლებას.

აქედან გამომდინარე ჩვენ ისევ ვაგრძელებთ თავისუფლებისთვის ბრძოლას. პირველი მოთხოვნა არის ახალი საარჩევნო სისტემა და მეორე რიგგარეშე არჩევნები. ძალიან კარგად იცის ხელისუფლებამ, რომ რიგგარეშე არჩევნები მათთვის არის დამღუპველი. მე მსურს, რომ მშვიდობიანი არჩევნები ჩატარდეს ქვეყანაში და ჩვენმა მოქალაქეებმა გადაწყვიტონ თუ ვინ უნდა იყოს ხელისუფლებაში. არ მივესალმები რევოლუციური ან ნახევრად რევოლუციურ არჩევნებს“ - განაცხადა გიორგი ვაშაძემ.