გადაწყვეტილების სამოტივაციო ნაწილის გაცნობის შემდეგ გადავწყვეტთ - პროკურატურა შეკითხვაზე, გაასაჩივრებს თუ არა "ქართუ ბანკის" საქმეზე დამდგარ განაჩენს

პოლიტიკა - 10:31, 02 Dec, 2019

1103

"ქართუ ბანკის" გაკოტრების საქმეზე საქალაქო სასამართლოს მიერ ნიკა მელიასა და ზურაბ ადეიშვილის მიმართ გამოტანილი გადაწყვეტილების გასაჩივრებაზე პროკურატურა მას შემდეგ იმსჯელებს, რაც გადაწყვეტილების სამოტივაციო ნაწილს გაეცნობა, - ამის შესახებ ჟურნალისტებს პროკურორმა ელიზბარ გოზალიშვილმა განიცხადა.

მისი თქმით, მათთვის მნიშვნელოვანია, რომ ორივე ბრალდებულის მიმართ გამამტყუნებელი განაჩენი დადგა, მათ შორის ერთ-ერთის, ზურაბ ადეიშვილის მიმართ კი ბრალდების პოზიცია სასამართლომ სრულად გაიზიარა.
"ჩვენ ველოდებით სასამართლოს გადაწყვეტილების სამოტივაციო ნაწილს და ამის შემდეგ გადავწყვეტთ, გავასაჩივროთ თუ არა ის, რაც შეეხება პარლამენტარის უფლებამოსილების შეწყვეტის საკითხს, ეს პარლამენტის წევრებმა უნდა გადაწყვიტონ", - თქვა პროკურორმა გოზალიშვილმა.
ამასთან, ადვოკატი გიორგი კონდახიშვილი ამბობს, რომ არაუგვიანეს 15 დღისა, საპროცედურო კომიტეტმა განაჩენი უნდა გაითხოვოს და დასკვნა პარლამენტის ბიუროს გადასცეს, ამის შემდეგ კი მანდატის შეწყვეტა პირველივე პლენარულ სხდომაზე მოხდება. მისივე თქმით, გამამტყუნებელი განაჩენი მანდატის შეწყვეტის საფუძველია.
შეგახსენებთ, საქალაქო სასამართლოს გადაწყვეტილებით, „ბანკ ქართუს“ გაკოტრების საქმეზე, „ნაციონალური მოძრაობის" ერთ-ერთი ლიდერი, ნიკა მელია ერთ ეპიზოდში გამართლდა, მეორე ეპიზოდში კი, რომელიც სამსახურეობრივი უფლებამოსილების ბოროტად გამოყენებას ითვალისწინებს, მის მიმართ გამამტყუნებელი განაჩენი დადგა.
მელიას 25 000 - ლარიანი ჯარიმა დაეკისრა და 2,3 წლის ვადით თანამდებობის დაკავების უფლება ჩამოერთვა.