ოპოზიციისა და ხელისუფლების წარმომადგენლებს შორის სასტუმრო "ბილტმორში" შეხვედრა მიმდინარეობს, რომელსაც დიპლომატიური კორპუსის წარმომადგენლებიც ესწრებიან.

შეხვედრამდე, საქართველოში ამერიკის შეერთებული შტატების ელჩის მოვალეობის შემსრულებელმა, ელიზაბეთ რუდმა განაცხადა, რომ აღნიშნული დიალოგი იქნება შესაძლებლობებისა და გადაწყვეტილების მოძებნის საშუალება.

"როგორც გახსოვთ, ამერიკის შეერთებულმა შტატებმა, ევროკავშირთან ერთად, გამოთქვა იმედი და მოუწოდა დიალოგისკენ მას შემდეგ, რაც 2020 წლისთვის პროპორციულ სისტემაზე გადასვლა ვერ მოხერხდა. ჩვენ ძალიან გვიხარია, რომ ეს დიალოგი დღეს დაიწყო. მიგვაჩნია, რომ აღნიშნული დიალოგი იქნება შესაძლებლობებისა და გადაწყვეტილების მოძებნის საშუალება, ვიდრე რამე ვარიანტის გამორიცხვა. ამერიკის შეერთებული შტატები მხარს უჭერს USAID-ის მეშვეობით აღნიშნულ შეკრებას და ასევე, ძალიან მოხარული ვართ, რომ შეხვედრაზე წარმოდგენილი არიან ვენეციის კომისიის წევრები, რომლებიც გააზიარებენ საკუთარ რჩევებსა და საექსპერტო შეხედულებებს. ჩვენც აქ ვართ, რათა მხარი დავუჭიროთ ამ პროცესს. აქ არიან ევროკავშირის დელეგაციის ელჩი და გერმანიის ელჩი. ვფიქრობ, შეხვედრის მონაწილეები გამოავლენენ იმას, რომ ქართულ საზოგადოებას შეუძლია, დაეყრდნოს დემოკრატიულ ინსტიტუტებს, ასევე შეხვედრის მონაწილეები გამოავლენენ საკუთარ ერთგულებას საქართველოს დემოკრატიული განვითარებისა ევროატლანტიკური ინტეგრაციისკენ და საუკეთესო გადაწყვეტილების მიღებაზე" - აღნიშნა რუდმა.