რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენელი ზურაბ აბაშიძე გრიგორი კარასინის განცხადებაზე, რითაც მან თბილისში რუსული კულტურისა და ენის ცენტრის გახსნა დააანონსა, განმარტებას აკეთებს.

აბაშიძე აცხადებს, რომ გრიგორი კარასინთან საკითხის შესახებ დეტალებზე საუბარი არ ჰქონია.

„შეხვედრის დროს, მე მოვისმინე მოკლე კომენტარი, რომ თბილისში არსებული სავიზო ცენტრი, რომელიც წარმოადგენს კომერციულ სტრუქტურას და გასცემს ვიზებს რუსეთში გასამგზავრებლად, აპირებს გახსნას რუსული ენის შემსწავლელი კურსები, ასევე კომერციულ საწყისებზე.

ჩემი საპასუხო კომენტარი იყო, რომ მე ამის შესახებ არ მქონდა ინფორმაცია, დავბრუნდები თბილისში და დავინტერესდები, თუ რაზეა საუბარი. ნამდვილად არ ვიცი, რას წარმოადგენს არუსული ენის კურსები. მოვიკითხავ ამას, მივიღებ სრულ ინფორმაციას და ამის შემდეგ მოგახსენებთ კვალიფიციურ პასუხს“, – განაცხადა ზურაბ აბაშიძემ.

ცნობისთვის, რუსეთის ფედერაციის საბჭოს წევრის, გრიგორი კარასინმა „რია ნოვოსტისთან“ ინტერვიუში განაცხადა, რომ თბილისში რუსული ენისა და კულტურის ცენტრი გაიხსნება.