"„გერმანული მოდელი“ ყველა მოთხოვნას აკმაყოფილებს, მაჟორიტარული ნარჩუნდება, პროპორციულობა უზრუნველყოფილია"

"„გერმანული მოდელი“ ყველა მოთხოვნას აკმაყოფილებს, მაჟორიტარული ნარჩუნდება, პროპორციულობა უზრუნველყოფილია" - უსუფაშვილი

პოლიტიკა - 17:22, 29 Nov, 2019

831

„შენების მოძრაობის“ ლიდერმა ჟურნალისტებთან ე.წ. გერმანული მოდელის უპირატესობებზე ისაუბრა. დავით უსუფაშვილის შეფასებით, ოპოზიციის მიერ შემუშაბევული კანონპროექტი "არ არის გერმანული კანონი, ეს არის ქართული პროექტი". მისივე შეფასებით, დიპლომატიური კორპუსი დაინტერესებულია საქართველოში კომპრომისის მიღწევით.

„ეს არ არის გერმანული კანონი, ეს არის ქართული პროექტი. მას შეიძლება ეწოდოს მაჟორიტარების შენარჩუნებით ჯამურად პროპორციულობის უზრუნველმყოფი კანონი გერმანულ გამოცილებაზე დაყრდნობით. თუკი ვინმე რამეს ითხოვს, აღნიშნული პროექტი ყველა მოთხოვნას აკმაყოფილებს, მაჟორიტარული ნარჩუნდება, პროპორციულობა უზრუნველყოფილია. ივანიშვილს ამ პროექტით იქით ვეხმარებით თავისი დანაპირების შესრულებაში. თუ მაჟორიტარები ვერ დაარწმუნა, რომ დღეს მაჟორიტარების გაუქმება სწორი იყო, ვეუბნებით, აჰა, მოდელი, დარწმუნდით, აღარ ვაუქმებთ მაჟორიტარებს და ყველამ მშვიდობიანად გავაგრძელოთ პოლიტიკური ცხოვრება.

დიპლომატები, რომლებიც საქართველოს სტრატეგიული მეგობარი ქვეყნების წარმომადგენლები არიან, მიდიან დასკვნამდე, რომ ეს ფართო კონსესუსი პროპორციული არჩევნების თაობაზე, ხელისუფლების შემოთავაზება და გაზიარებული ინიციატივა ყველას მხრიდან არის შესასრულებელი. სხვა შემთხვევაში პროცესები მიექანება არაკონტროლირებადი მიმართულებით, რომელმაც საქართველოსთან ერთად შეიძლება დააზიანოს სხვა ქვეყნების ინტერესებიც საქართველოში და რეგიონში. დიახ, ისინი სისხლხორცეულად არიან დაინტერესებულნი კომპრომისის მიღწევით“, - თქვა უსუფაშვილმა.