სკანდალი: "სპეცრაზმელებმა კასტეტი დამარტყეს და შუბლი გამიტეხეს, 8 ნაკერი მადევს“ - როგორ გაუსწორდა რეჟიმი მოქალაქეს 25 ნოემბრის აქციის დარბევის დროს

პოლიტიკა - 20:01, 28 Nov, 2019

1802

აფხაზეთიდან დევნილი თენგო ქუთელია აცხადებს, რომ 25 ნოემბრის აქციის დარბევის დროს სპეცრაზმელები მას სასტიკად გაუსწორდნენ.

მისი თქმით, სპეცრაზმელებმა ის შეათრიეს და თავის არეში კასტეტით ჭრილობები მიაყენეს.

"25 ნოემბერს, პარლამენტის წინ ვიდექი დარბევას როდესაც გეგმავდნენ. ხელები აწეული გვქონდა ყველას და ვთხოვდით რობოკოპებს რომ ძალა არ გამოეყენებინათ.

ჩემს გვერდით მოხუცი კაცი იდგა ხელჯოხით, შშმ პირი იყო. ჭყლეტვაში მოყვა ეს კაცი, დაეცა და მის წამოყენებას ვცდილობდი. თან ვთხოვდი სპეცრაზმელებს რომ ფეხი არ დაებიჯებინათ მისთვის და არ გადაევლოთ ზედ.

წყლის ჭავლში მოვახერხეთ და ეს კაცი წამოვაყენეთ. უცებ, მარცხენა მხრიდან, ორმა სპეცრაზმელმა ხელი მტაცა და შიგნით შემაგდო, სადაც მწკრივად ე.წ. რობოკოპები იყვნენ.სპეცრაზმელებმა ვერცხლისფერი კასტეტი დამარტყეს და შუბლი გამიტეხეს, 8 ნაკერი მადევს..."- აცხადებს "პრესა.ჯი"-სთან მოქალაქე.

მისივე განცხადებით, ორი სპეცრაზმელი ფიზიკურად გაუსწორდა.

" კასტეტის დარტყმის შემდეგ, სპეც-დანიშნულების პირები ცდილობდნენ რომ სხვა მხარეს გადავეყვანე. ალბათ, ჩემი მოშორება, გადამალვა უნდოდათ. გონება არ დამიკარგავს, მათი საუბარიც კი მესმოდა, ერთმანეთს ეუბნებოდნენ: „ეს რა ქენი, როგორ დაარტყიო.“

რაღაც მანძილი გავიარეთ და შემთხვევით, ვიღაც აქციის მონაწილე შეგვხვდა და სწორედ მან აღმომიჩინა დახმარება, მიმიყვანა სასწრაფო დახმარების მანქანასთან და გადამარჩინა, მადლობის მეტი არაფერი მეთქმის მისთვის!"- აცხადებს მოქალქე.