"ძლიერი და ჰუმანური სახელმწიფო" - დარბევის შემდეგ "ოცნებას" ახალი მესიჯბოქსი აქვს

პოლიტიკა - 15:57, 26 Nov, 2019

1350

ერთ კვირაში დარბეული ორი აქციის შემდეგ, “ქართული ოცნების“ ლიდერებს ახალი მესიჯბოქსი აქვთ. მმართველი პარტიის ლიდერები აცხადებენ, რომ სახელმწიფომ სიძლიერესთან ერთად ჰუმანურობაც გამოიჩინა.

ირაკლი კობახიძე და მამუკა მდინარაძე ირწმუნებიან, რომ პოლიცია გუშინაც, ისევე როგორც სხვა დარბევისას ჰუმანურად იქცეოდა.

"ამ დღეებში გამოჩნდა პოლიციის მოქმედებებში, რომ ერთდროულად შეიძლება იყო ძლიერი და იყო ჰუმანური - ეს პრინციპი დანერგა ქართლმა პოლიციამ, თავიანთი მოქმედებებით,” - თქვა მდინარაძემ.

მისი თქმით, მალე “ნაციონალური მოძრაობა” აღარ იარსებებს და შესაძლებელი გახდება იმის თქმა, რომ მედია აბსოლუტურად თავისუფალია.

პოლიციის ჰუმანურობაზე საუბრობს ირაკლი კობახიძეც და ოპოზიცია შემდეგი სიტყვებით გააკრიტიკა: “ანტიეროვნული, ანტისახელმწიფოებრივი და ანტიეკლესიური ძალები".

“მადლობა მინდა გადავუხადო სამართალდამცავ ორგანოებს, რომლებმაც ამ დღეების განმავლობაშ წარმოაჩინეს სახელმწიფო, როგორც ძლიერი და ჰუმანური სახელმწიფო,” - თქვა კობახიძემ.

კობახიძე ოპონენტებს დაემუქრა და თქვა, რომ სამომავლოდ პარლამენტში “ნაციონალური მოძრაობის” წარმომადგენლები აღარ იქნებიან.