"ქართული ოცნების" დეპუტატის კახა ოქრიაშვილის თქმით, ქვეყანაში სამწუხარო პოლიტიკური პროცესები მიმდინარეობს, რომელიც შესაძლოა, რიგგარეშე არჩევნებით დასრულდეს.

"სამწუხარო პოლიტიკური პროცესები განვითარდა. თუ ეს ასე გაგრძელდა მომავალში, ვფიქრობ, რომ დასრულდება რიგგარეშე არჩევნებით" - აღნიშნა ოქრიაშვილმა.

მან არ უპასუხა დარბევასთან დაკავშირებულ შეკითხვებს და ამის მიზეზად ის დაასახელა, რომ შსს-ს წარმომადგენელი არ არის. მან ჟურნალისტები შსს-თან გადაამისამართა:

„მე ვარ დეპუტატი, მე არ ვარ შსს-ს წარმომადგენელი. ეს კითხვა უნდა დაუსვათ შსს-ს წარმომადგენელს, რატომ მოხდა აქციის დაშლა,“-თქვა მან.

პარლამენტში ბიუროს სხდომა დაიწყო. აქციის მონაწილეების პროტესტის მიუხედავად, დეპუტატებმა საკანონმდებლო ორგანოში შეღწევა მაინც შეძლეს.

შეგახსენებთ, დილის 05:00-ზე რობოკოპებისა და წყლის ჭავლის გამოყენებით შსს-მ პარლამენტთან მიმდინარე აქცია დაარბია. რამდენიმე ადამიანი დაშავდა, დაშავებულია "მთავარი არხის" ჟურნალისტი ვასილ დაბრუნდაშვილიც, რომელსაც წყლის ჭავლმა ხელი მოტეხა.

შსს-ს განცხადებით, პროტესტი გასცდა გამოხატვის თავისუფლების ჩარჩოებს და დაირღვა კანონი მანიფესტაციებისა და შეკრებების შესახებ, რის გამოც საპოლიციო ძალებმა რუსთაველის გამზირზე მიმდინარე აქცია დაშალეს და პარლამენტის შესასვლელების ბლოკირება აღკვეთეს. დაკავებულია 30-ზე მეტი ადამიანი, მათ პოლიციისადმი დაუმორჩილებლობა და წვრილმანი ხულიგნობა ედებათ ბრალად.