აქციაზე შეშის მიტანის მცდელობისთვის სამართალდამცავებმა "ევრიპული საქართველოს" ერთ-ერთი ლიდერი გიგა ბოკერია და თენგიზ გუნავა დააკავეს. ბოკერიას განცხადებით, პოლიციას რეჟიმმა დაავალა, რომ მომიტინგეებს არ მისცენ გათბობის საშუალება. მისი თქმით, მათ წალამი მიიტანეს, რასაც პოლიციის მხრიდან „წალმის ამოღების ოპერაცია“ მოჰყვა.

„ძალიან სამწუხარო რეალობაა, პოლიციას რეჟიმმა დაავალა, რომ არ უნდა მისცენ მომიტინგეებს გათბობის საშუალება. იცით, რომ მთელი დღეა, სამარცხვინო ბრძანებებს ასრულებინებენ. ჩვენც გავაჩერეს, შეშა რომ მოგვქონდა. იქ იყვნენ ხელმძღვანელები, ბატონი კირკიტაძე იყო. გვითხრა, რომ შეშა არის აკრძალული. შეშა ესროლა რამოდენიმე მომიტინგემ პოლიციასო, ასეთი გამართლება უპოვეს. მივიღეთ ამ არარაციონალური ბრძანების შესახებ ინფორმაცია და მოვიტანეთ წალამი, რომელსაც ვერავის ესვრი. ამას მოჰყვა უზარმაზარი ოპერაცია, რათა ამოეღოთ წალამი. ამ ოპერაციაში გუნავა, მეც და ნიკა თარგამაძე დაგვაკავეს და კიდევ რამდენიმე ჩვენი აქტივისტი. ოღონდ ჩვენ მალევე გამოგვიშვეს პატრულის თანამშრომლებმა. გვითხრეს, რომ განგარიდეთ სიტუაციასო. მთავარი საკითხი არის აქ, რა დღეშია პოლიცია ჩაგდებული. ჯერ რა სიბრიყვეა, რომ ეს ჩაახშობს პროტესტს“, – განაცხადა გიგა ბოკერიამ.

მოგვიანებით სამართალდამცველებმა ბოკერია და გუნავა გაუშვეს.