„ქართული ოცნების“ ცენტრალურ ოფისში 10:00 საათზე საპარლამენტო უმრავლესობის სხდომა გაიმართება.

სავარაუდოდ სხდომის შემდეგ, ცნობილი გახდება, რაზე შეთანხმდნენ ბიძინა ივანიშვილი და მაჟორიტარი დეპუტატები გუშინდელ შეხვედრაზე.

"ჩვენ, როგორც წესი გვაქვს, საბოლოო დასკვნითი ეტაპი უკვე უმრავლესობის სხდომაა, სადაც საბოლოოდ გადაწყვეტს გუნდი, ნებისმიერ საკითხთან დაკავშირებით თავის მოსაზრებას იტყვის. ეს იქნება როგორც ვაკანტურ თანამდებობებთან დაკავშირებით, თუ სად, რომელ პოზიციაზე უმრავლესობის რომელი წევრი იქნება წარდგენილი, ამას მედია და საზოგადოება გაიგებს უმრავლესობის სხდომის დამთავრებისთანავე. ასევე, ბიუროს დღის წესრიგით გათვალისწინებული საკითხები და სხვადასხვა საკითხი, რომლებსაც დააყენებს უმრავლესობის ესა თუ ის წევრი, იქნება განხილული და ამის შესახებაც იქნება ცნობილი საზოგადოებისთვის. ჩვენ შიდა სამზარეულოში კონსულტაციები მიმდინარეობდა და ახლაც მიდის. მესმის საჯარო ინტერესი, თუმცა ჩვენ ვიცავთ წესრიგს, რაც აუცილებელია მმართველი პარტიისთვის განსაკუთრებით და ზოგადად, მთლიანად პოლიტიკური სპექტრისთვის, რომ შიდა სამზარეულო, სანამ არ იქნება უმრავლესობის საბოლოო გადაწყვეტილება, არ უნდა გაჟღერდეს. განხილული იყო სხვადასხვა კანდიდატურა და ამ კანდიდატურებს გაცნობებთ დღეს" - აღნიშნა მაჭარაშვილმა.