თბილისის ბიუჯეტის 2020 წლის პროექტის თანახმად ბაგა-ბაღების დაფინანსება მცირდება. 7091 სკოლამდელი აღზრდის მუხლში დაფინანსების სახით განსაზღვრულია 144 668,9 ათასი ლარი, მიმდინარე 2019 წლის ბიუჯეტში ეს თანხა შეადგენს 145 193,5 ათას ლარს, ხოლო 2018 წელს იყო – 121 343,8 ათასი ლარი.

რაც შეეხება სკოლამდელი აღზრდის დაწესებულებების ხელშეწყობის მუხლს, ამ ქვე პროგრამაში გათვალისწინებულია 24 627,1 ათასი ლარი, იგივე მუხლის დაფინანსება მიმდინარე წლის ბიუჯეტში არის 31 295,1 ათასი ლარი, ხოლო 2018 წელს იყო 19 958,4 ათასი ლარი.

ბიუჯეტის პროექტის თანახმად ჩანს, რომ ამ ეტაპზე სფეროს დაფინანსება შემცირებულია.

Edu.aris.ge-ს ინფორმაციით, გიორგი გახარიამ პრემიერმინისტრის პოსტზე დანიშვნის შემდეგ, პირველივე მთავრობის სხდომაზე განათლების სფეროზე საუბრისას განაცხადა, რომ 2020 წლიდან სკოლის პედაგოგების პარალელურად, ანაზღაურება საშუალოდ 100 ლარით გაეზრდებათ საბავშო ბაღების მასწავლებლებსაც.

„სრულ განაკვეთზე მყოფი მასწავლებლების ანაზღაურება იზრდება როგორც მიმდინარე, ისე მომავალი სასწავლო წლის განმავლობაში, რაც ნიშნავს, რომ 2020 წლის სასწავლო წლისთვის მასწავლებლების ხელფასი გაიზრდება 300 ლარით. ასევე მინდა გითხრათ, რომ 2020 წლის სასწავლო წლისთვის საბავშვო ბაღების მასწავლებლების ხელფასები გაიზრდება საშუალოდ 100 ლარით“, – განაცხადა გიორგი გახარიამ.

თბილისის 2020 წლის ბიუჯეტი, პროექტის თანახმად 1 მილიარდ 20 მილიონი ლარით განისაზღვრა, რაც 2019 წლის თავდაპირველად დამტკიცებულ ბიუჯეტთან მიმართებაში 92 368.5 ათასი ლარით მეტია.

თბილისის საკრებულოს დეპუტატების გადაწყვეტილებით, დედაქალაქის 2020 წლის ბიუჯეტის პირველადი პროექტი, შესაბამისი რეკომენდაციებით, მერიას გადაეგზავნება. ბიუჯეტის პროექტის ჩასწორებულ ვარიანტს დედაქალაქის მერია საკრებულოს 10 დეკემბრამდე დაუბრუნებს.