შალვა ფიფია თელ-ავივში საერთაშორისო გამოფენა WATEC-ს დაესწრო

ბიზნესი & ეკონომიკა - 17:41, 23 Oct, 2013

1440

ოქტომბერს საქართველოს სოფლის მეურნეობის სამინისტროს დელეგაცია, მინისტრის - შალვა ფიფიას ხელმძღვანელობით, სამუშაო ვიზიტით ისრაელში იმყოფება.

ვიზიტის ფარგლებში, 22 ოქტომბერს შალვა ფიფია და სოფლის მეურნეობის მინისტრის მოადგილე ილია კვიტაიშვილი მე-6 საერთაშორისო სავაჭრო-ეკონომიკური გამოფენის WATEC-ის (წყლის ტექნოლოგიებისა და გარემოს კონტროლის გამოფენა-კონფერენცია) გახსნის ცერემონიალს დაესწრნენ. გამოფენას ისრაელის ეკონომიკის მინისტრი ნაფტალ ბენნეტი, ასევე ისრაელის მთავრობისა და საქმიანი წერეების წარმომადგენლები ესწრებოდნენ.

გამოფენაზე წარმოდგენილი იყო უახლესი და ინოვაციური ტექნოლოგიები წყლის რესურსის მართვის მიმართულებით. მათ შორის სასმელი წყლის ფილტრაციისა და ლაბორატორიული კვლევებისთვის საჭირო დანადგარები, სარწყავი და სადრენაჟე სისტემები.

,,თანამედროვე ტექნოლოგიების დანერგვა, ეს არის ერთერთი მნიშვნელოვანი რგოლი ქვეყნის განვითარებისთვის. სარწყავი წყლის ეფექტური გამოყენება და მართვა, სადრენაჟე სისტემები ჩვენი ქვეყნის სოფლის მეურნეობას მნიშვნელოვნად განავითარებს. აღნიშნულ გამოფენაზე ჩვენ საშუალება გვაქვს გავეცნოთ მსოფლიოს სხვადასხვა ქვეყნის ყველაზე თანამედროვე ტექნოლოგიებს ბუნებრივი რესურსების ეფექტური გამოყენების კუთხით “, -განაცხადა შალვა ფიფიამ.

სოფლის მეურნეობის სამინისტროს დელეგაცია დეტალურად გაეცნო საგამოფენო ცენტრში წარმოდგენილ თანამედროვე სისტემებსა და ტექნოლოგიებს. შალვა ფიფიამ და ილია კვიტაიშვილმა შეხვედრები გამართეს გამოფენის მონაწილე კომპანიების წარმომადგენლებთან.

გამოფენა WATEC-ის (წყლის ტექნოლოგიებისა და გარემოს კონტროლის გამოფენა-კონფერენცია) პროფილს წარმოადგენს წყლისა და გარემოს კვლევა და ანალიზი, სარწყავი სისტემები, წყლის ხარჯვისა და მონიტორინგის მოწყობილობები, წყლის ხარისხისა და მიმოქცევის კონტროლის მექანიზმები, წყლის დაზოგვისა და დაგროვების, ასევე გაჟონვის კონტროლის სისტემები, წყლის გამტკნარების ტექნოლოგიები.