ოკუპირებული ცხინვალი ვაჟა გაფრინდაშვილის დაკითხვის ახალ დეტალებს ასაჯაროებს, სადაც აღნიშნულია, რომ ქართველმა ექიმმა ე.წ საზღვარი სპეციალურად გადაკვეთა და მოინახულა სოფელ მონასტერში არსებული ტაძარი. ინფორმაციას ე.წ "სამხრეთი ოსეთის" მედია ავრცელებს.

გაცხადებული ინფორმაციის თანახმად, ვაჟა გაფრინდაშვილმა უარი განაცხადა ეპასუხა კითხვაზე, თუ რომელ ქართულ პარტიას უჭერს მხარს და ხაზგასმით აღნიშნა, რომ საქართველოს ნატოში გაწევრიანების მომხრეა და არ მიიჩნევს ე.წ „ საზღვრის“ დარღვევის ფაქტს უკანონობად, რადგან მისი აზრით, სამხრეთი ოსეთი ოკუპირებულია რუსეთის ფედერაციის მიერ, რომელიც საქართველოს ნომერ პირველი მტერია ,- აცხადებს დაპატიმრებული ქართველი ექიმი.

ოკუპირებული დე ფაქტო ხელისუფლების უშიშროების სამსახური აღნიშნავს, რომ დასავლურ და ქართულ მედიაში ატეხილი ისტერია ვაჟა გაფრინდაშვილის დაუყოვნებლივ გათავისუფლებასთან მიმართებით, უშუალოდ დაკავშირებულია საქართველოში მიმდინარე მასობრივ საპროტესტო აქციებთან.

ე.წ სამხრეთი ოსეთის სახელმწიფო უსაფრთხოების სამსახურის კომიტეტის განცხადებაში ნათქვამია, რომ ოფიციალური თბილისის, ქართული ოპოზიციის და მისი დასავლური კურატორების მცდელობა, მოაგროვონ პოლიტიკური ქულები ვაჟა გაფრინდაშვილის დაკავებით იქნება უშედეგო. აგრეთვე აღნიშნავენ , რომ აღნიშნული საკითხი სამხრეთი ოსეთის ხელისუფლებაზე ზეწოლის განსახორციელებლად და შიდა რეიტინგის გასაუმჯობესებლად უპერსპექტივო იქნება.