პოლიციელს, რომელმაც თითქმის ყველა დაკავებულის წინააღმდეგ მისცა ჩვენება, ტერიტორიიდან გასასვლელად სპეცდერეფანი დასჭირდა

პოლიტიკა - 10:25, 21 Nov, 2019

2008

პოლიციელს, რომელმაც თითქმის ყველა დაკავებულის წინააღმდეგ მისცა ჩვენება, ტერიტორიიდან გასასვლელად სპეცდერეფანი დასჭირდა
პოლიციელებმა სპეციალური დერეფნის მეშვეობით გაიყვანეს თბილისის საქალაქო სასამართლოს ტერიტორიიდან პოლიციელი, რომელიც 18 ნოემბერს დაკავებულთა სასამართლო პროცესში მონაწილეობდა და თითქმის ყველა აქტივისტის წინააღმდეგ მისცა ჩვენება .
სასამართლოს დარბაზთან მყოფმა მოქალაქეებმა ამ პოლიციელის გამოჩენისთანავე ობსტრუქცია მოაწყვეს.
რაც შეეხება 18 ნოემბერს დარბევის დროს დაკავებულთა სასამართლო პროცესს, მოსამართლე ვალერიანე ფილაშვილმა 18 ნოემბრის აქციის დაშლისას ადმინისტრაციული წესით დაკავებული პირებიდან საკრებულოს წევრი ირაკლი ნადირაძე, გიგა მაქარაშვილი და მათთან ერთად დაკავებული კიდევ 3 პირი - დიმიტრი ბიძინაშვილი, დავით მჟავანაძე და ირაკლი კაჭარავა სამართალდამრღვევად სცნო.
კიდევ ერთი დაკავებული პაატა სოსანაშვილი კი მოსამართლემ გაათავისუფლა ადმინისტრაციული სახდელისგან და მას სიტყვიერი გაფრთხილება გამოუცხადა.
მოსამართლემ საკრებულოს წევრს ირაკლი ნადირაძეს 13 დღიანი, გიგა მაქარაშვილს 12 დღიანი, დიმიტრი ბიძინაშვილს 13 დღიანი, დავით მჟავანაძეს და ირაკლი კაჭარავას კი 4-4 დღიანი ადმინისტრაციული პატიმრობა შეუფარდა.
მანამდე მოსამართლემ ბექა ბასილაიას 13 დღიანი, ელგუჯა ბაგრატიონს 12 დღიანი, ზუკა ბერძენიშვილს 7 დღიანი, ლუკა ჭიჭინაძესა და გიორგი ბუნტურს 5-5 დღიანი ადმინისტრაციული პატიმრობა შეუფარდა.