ჩვენ დავეხმარებით საქართველოს ნატო-ში გაწევრიანების გზაზე

ჩვენ დავეხმარებით საქართველოს ნატო-ში გაწევრიანების გზაზე - იენს სტოლტენბერგი

პოლიტიკა - 19:39, 20 Nov, 2019

919

ნატო-ს გენერალურმა მდივანმა იენს სტოლტენბერგმა ბრიუსელში, ალიანსის საგარეო საქმეთა მინისტრების შეხვედრის დაწყებამდე ჟურნალისტებთან კომენტარი გააკეთა და განაცხადა, რომ შავი ზღვის რეგიონი ნატო-სთვის მნიშვნელოვანია.

მისივე თქმით, ნატო-მ ბოლო წლებში შავი ზღვის რეგიონში საკუთარი წარმომადგენლობა გაზარდა. სტოლტენბერგი მოკავშირეებს მოუწოდებს, საქართველო და უკრაინა საჭირო რესურსებით უზრუნველყონ.

„ჩვენ მიმდინარე წლის აპრილში შევთანხმდით პაკეტზე, რათა ჩავატაროთ უფრო მეტი წვრთნები, გავზარდოთ ინფორმაციის გაცვლა. ჩრდილოატლანტიკური საბჭო ცოტა ხნის წინ საქართველოს ესტუმრა. ასევე, ვესტუმრეთ უკრაინას, კერძოდ, ოდესას. ჩვენ ვთანამშრომლობთ ქართულ სანაპირო დაცვასთან, ვმუშაობთ უკრაინის საზღვაო ფლოტის აკადემიის წარმომადგენლებთან. ასე რომ, ჩვენ შავი ზღვის რეგიონში პარტნიორებთან, საქართველოსთან და უკრაინასთან ინტენსიურად ვმუშაობთ. მოვუწოდებ მოკავშირეებს, რომ ისინი უზრუნველვყოთ საჭირო რესურსებით. დავრწმუნდეთ, რომ გაცილებით მეტ პრაქტიკულ მხარდაჭერას ვაწვდით“, – განაცხადა სტოლტენბერგმა.

იენს სტოლტენბერგმა აღნიშნა, რომ ნატო დაეხმარება და მხარს დაუჭერს საქართველოს ალიანსში გაწევრიანების გზაზე.

„ჩვენ დავეხმარებით და მხარს დავუჭერთ საქართველოს ნატო-ში გაწევრიანების გზაზე. სწორედ ამიტომ, ჩვენ ვეხმარებით მათ თავდაცვისა და უსაფრთხოების ინსტიტუტების მოდერნიზებაში, რეფორმების განხორციელებაში. სწორედ ეს არის საქართველოში ნატო-ს წარმომადგენლობის მიზანი“ ,- აცხადებს იენს სტოლტენბერგი.