2019 წლის ივლისში რუსეთის მიერ საქართველოსთან ავიამიმოსვლის აკრძალვის გამო რუსულმა საავიაციო კომპანიებმა 3,2 მილიარდი რუბლით იზარალეს, - ინფორმაციას რუსული მედია ავრცელებს.

"ვედომოსტის" ცნობით, ავიაკომპანიებმა ტრანსპორტის სამინისტროში პატაკი წარადგინეს, რადგან ხელისუფლება ზარალის ანაზღაურებას დაჰპირდა, თუმცა სიტყვა ამ დრომდე არ შეუსრულებია.

ყველაზე მეტად ავიაკომპანიებიდან "ურალის ავიახაზები" დაზარალდა - 1-დან 1,3 მილიარდ რუბლამდე.

"აეროფლოტმა" და S7-მა 600-700 მილიონი რუბლის ზარალი განიცადეს.

ავიაკომპანიებში აცხადებენ, რომ თვითმფრინავები, რომლებიც საქართველოში უნდა გაფრენილიყვნენ, აგვისტომდე უქმად იდგნენ, ხოლო ორიენტირის შეცვლამ კომპანიები აიძულა, ბილეთები გაეიაფებინათ.