თბილისის მერი კახი კალაძე IRI-ის კვლევას უნდობლობას უცხადებს. მისი თქმით, "ქართული ოცნების" და მის მიმართ საზოგადოების დამოკიდებულება კვლევის გარეშეც იცის.

"არ მჭირდება არავის კვლევები, ძალიან კარგად ვიცი საზოგადოების დამოკიდებულება პარტია „ქართული ოცნების“ მიმართ და პირადად ჩემ მიმართ. ყოველდღიური კომუნიკაცია მაქვს მოსახლეობასთან, არ დამიკარგავს ეს კომუნიკაცია, რაც პოლიტიკაში ვარ, ყოველდღიურ რეჟიმში ვხვდებით ასეთი პროექტების განხორციელების დროს მოსახლეობას, ვესაუბრებით, ვიღებთ მათ ტკივილს, რა სჭირდებათ, რა უნდა გაკეთდეს, რა არის მოსაწესრიგებელი, ვაცნობთ ჩვენ სამოქმედო გეგმებს, თუ რა გაკეთდება მომავალში, როგორი იქნება ხვალ მათი კონკრეტული უბანი, კონკრეტული რაიონი და ჩვენი დედაქალაქი. ეს არის ჩემთვის ყველაზე მნიშვნელოვანი. ვთქვათ, თეორიულად ჩავთვალოთ, რომ ეს არის სწორი კვლევა. გამოკითხულებიდან რამდენმა იცის და რამდენი ერკვევა პროპორციულ და მაჟორიტარულ სისტემებს შორის განსხვავებაში. იყო ეს კითხვა დასმული? ადამიანთან რომ მიდიხარ და რაღაცას ეკითხები, თუ არ იცის, რა პასუხი უნდა გაგცეს? თეორიულად რომ ავიღოთ, თითქოს სწორია ეს კვლევა, მაშინ, რატომ ნერვიულობენ? რა აქვთ სანერვიულო? თუ მთლიან ოპოზიციას პარტია „ქართული ოცნება დემოკრატიულ საქართველოზე“ ორჯერ მეტი რეიტინგი აქვს, მაშინ რა ჰქონიათ სანერვიულო. მოსახლეობა გამოვა 2020 წელს და მიიღებს გადაწყვეტილებას საარჩევნო ყუთებთან" - აღნიშნა კახი კალაძემ.