ექიმი ვაჟა გაფრინდაშვილი ცხინვალის სასამართლოში: "საქართველოში ვარ, საზღვარი არ გადამიკვეთავს"

პოლიტიკა - 15:36, 16 Nov, 2019

5478

რუსი ოკუპანტების მიერ დაკავებული ქართველი ექიმი-ტრავმატოლოგი ვაჟა გაფრინდაშვილი არ აღიარებს "სახელმწიფო საზღვრის გადაკვეთის" შესახებ საოკუპაციო რეჟიმის მიერ წაყენებულ ბრალდებას და ცხინვალის სასამართლოში განაცხადა, რომ საქართველოში იმყოფება.

ამის შესახებ ინფორმაციას მასთან ერთად დაკავებული და უკვე გათავისუფლებული პირები ავრცელებენ, ვაჟა გაფრინდაშვილის პოზიციის შესახებ კი პირველი ინფორმაცია ჟურნალისტმა ლაშა ბერულავამ 14 ნოემბერს გაავრცელა, სადაც აღნიშნავდა, რომ დაკავებისას ოკუპანტებს ვაჟა ექიმმა განუცხადა, რომ სახელმწიფო საზღვარი მხოლოდ როკის გვირაბთან და ფსოუზე იცის.

ექიმი დავით ღვინიაშვილი, რომელიც რამდენიმე დღის წინ ასევე საოკუპაციო ძალების მიერ დაკავებულ პირებს შეხვდა, ჰყვება, რომ თანასაკნელების თხოვნამ ვერ გაჭრა და ვაჟა გაფრინდაშვილმა პოზიცია არ შეიცვალა.

გათავისუფლებულებმა მას უთხრეს, რომ ერთადერთი რამ, რასაც ოკუპირებული რეჟიმი ვაჟა გაფრინდაშვილისგან მოითხოვს, არის ის, რომ აღიაროს "საზღვრის გადაკვეთა".

"ბატონი ვაჟა კატეგორიულ უარს აცხადებს და ამბობს, რომ იმყოფება საქართველოში, ქართულ მიწაზე. ვერ გაჭრა თურმე ვერც ქართველ თანასაკნელთა ხვეწნამ და შეგონებამ,"- ჰყვება ღვინიაშვილი.

qartli.ge-ისთან საუბარში იზოლატორიდან გათავისუფლებულები ამბობენ, რომ გაფრინდაშვილი თავს კარგად გრძნობს.

შეგახსენებთ, ვაჟა გაფრინდაშვილი რუსმა ოკუპანტებმა 9 ნოემბერს გაიტაცეს. ექიმი ახალგორში დაზიანებული ავადმყოფისთვის დახმარების გასაწევად მიდიოდა. ქართულმა მხარემ ინფორმაცია მხოლოდ მას შემდეგ დაადასტურა, რაც ქართველი ექიმის დაკავების შესახებ ოსურმა მედიამ დაწერა. ცხინვალის სასამართლომ ვაჟა გაფრინდაშვილს ორთვიანი წინასწარი პატიმრობა მიუსაჯა.