ვაჟა გაფრინდაშვილის გათავისუფლების მოთხოვნით საქართველოს ექიმთა ასოციაცია განცხადებას ავრცელებს

პოლიტიკა - 16:30, 15 Nov, 2019

973

ცხინვალში დაკავებული ქართველი ექიმის, ვაჟა გაფრინდაშვილის გათავისუფლების მოთხოვნით საქართველოს ექიმთა ასოციაცია განცხადებას ავრცელებს, რომელსაც უცვლელად გთავაზობთ:

„მივმართავთ ცხინვალის რეგიონის სამედიცინო პერსონალს - გააკეთეთ ყველაფერი კოლეგის - ვაჟა გაფრინდაშვილის გასანთავისუფლებლად, რომელიც უკანონოდ არის დაკავებული. ექიმის საქმიანობის ხელის შეშლა დაუშვებელია ნებისმიერ სიტუაციაში, მათ შორის საომარი მოქმედებების დროს“,- ნათქვამია ასოციაციის განცხადებაში.

ორგანიზაციის წევრები ასევე მოუწოდებს საქართველოს ჯანდაცვის სამინისტროს ხელმძღვანელ პირებს, რომ გადადგან ქმედითი ნაბიჯები ვაჟა გაფრინდაშვილის გასათავისუფლებლად.

„ასოციაციის ხელმძღვანელობა, ფინეთში, საერთაშორისო ფორუმზე იმყოფება და ყველა ღონეს ხმარობს, რათა აღნიშნული საკითხის მოგვარებაში საერთაშორისო სამედიცინო ორგანიზაციებიც ჩართოს“, - აღნიშნულია განცხადებაში.

შეგახსენებთ, ტრავმატოლოგი ვაჟა გაფრინდაშვილი ოკუპანტებმა რამდენიმე დღის წინ, სავარაუდოდ, სოფელ ორჭოსანთან ყოფნის დროს გაიტაცეს, სადაც ის დაშავებულის მონახულებას აპირებდა. საქართველოს ხელისუფლებამ ფაქტი ნმხოლოდ გატაცებიდან მესამე დღეს, მას შემდეგ დაადასტურა, რაც დაკავების შესახებ ცხინვალის მედიაში ინფორმაცია გავრცელდა. პარასკევს ცხინვალის სასამართლომ ვაჟა გაფრინდაშვილს ორი თვით პატიმრობა შეუფარდა.