"პარტიის თავმჯდომარესთან მძიმე საუბარი იყო, ნაწყენიც იქნება"- ივანიშვილის სპექტაკლი გრძელდება?

პოლიტიკა - 18:59, 13 Nov, 2019

2020

"ქართული ოცნების" მაჟორიტარი დეპუტატები, დიმიტრი ხუნდაძე და ირაკლი შიოლაშვილი აცხადებენ, რომ რამდენიმე წუთის წინ ბიძინა ივანიშვილს შეხვდნენ და საარჩევნო სისტემის ცვლილებასთან დაკავშირებით "მძიმე საუბარი" ჰქონდათ.

შიალაშვილი ამტკიცებს, რომ "ივანიშვილი მათი პოზიციის გამო ნაწყენიც კი იქნება".

"დღეს საღამოს ჩემსა და ბიძინა ივანიშვილს შორის შეხვედრა შედგა. მძიმე საუბარი იყო და გავაწბილე კიდეც პარტიის თავმჯდომარე, დარწმუნებული ვარ ნაწყენიც იქნება ჩემზე"- აცხადებს დეპუტატი.

მისი თქმით, მხარეები ვერ შეჯერდნენ.

"ვერ შევჯერდით და მგონი, ვაწყენინე კიდეც ბატონ ბიძინას. ჩემი მხრიდან პოზიციის სიზუსტეში ვერ დავარწმუნე, ისე, როგორც მან ვერ დამარწმუნა, რატომ უნდა დავუჭიროთ ამ კანონპროექტს მხარი. ვრჩები ჩემს პოზიციაზე. დაზუსტებით შემიძლია გითხრათ, რომ ბატონი ბიძინა მუშაობს ყველა იმ დეპუტატთან, რომელიც ჩვენს რიგებში მოიაზრება. ვერ გეტყვით ხვალისთვის რა შედეგები იქნება, თუმცა რასაც ვამბობ, გიდასტურებთ, რომ ბატონ ბიძინას პირისპირ შევხვდით პარტიის ოფისში”,-განაცხადა შიოლაშვილი.

დიმიტრი ხუნდაძის განცხადებით კი თუ ხვალ ის შედეგი არ დადგა, რასაც ელოდება, შესაძლოა, გუნდიც დატოვოს და მანდატიც.

"მთხოვა დავფიქრებულიყავი და არ დამეზიანებინა საკუთარი გუნდი. შემდეგ ეს თხოვნა იყო უფრო პრინციპული, მაგრამ ვრჩები ჩემს პოზიციზე. არ იყო მსუბუქი და მარტივი საუბარი. რა თქმა უნდა, ეს საუბარი ურთიერთპატივისცემით მიმდინარეობდა, მაგრამ ზოგჯერ მკაცრი იყო, პოზიციები მანაც და მეც შევინარჩუნეთ ის, რაც გვქონდა. თუ ხვალ ის შედეგი არ დადგა, რასაც ველოდები, მაშინ არ დავაზიანებ საკუთარ გუნდს, რომლითაც მოვედი პოლიტიკაში. შესაძლოა, დავტოვო გუნდი, მაგრამ ამავე დროს დავტოვებ მანდატსაც"- თქვა მან.