"ივანიშვილს მოვუწოდებ, არ დაარღვიონ შეთანხმება, თორემ მიიღებს საკადრის პასუხს საზოგადოებისგან"

"ივანიშვილს მოვუწოდებ, არ დაარღვიონ შეთანხმება, თორემ მიიღებს საკადრის პასუხს საზოგადოებისგან" - ნიკა მელია

პოლიტიკა - 18:35, 12 Nov, 2019

1286

"ერთიანი ნაციონალური მოძრაობის" პოლიტსაბჭოს ლიდერი ნიკა მელია პარლამენტში მივიდა.

მელიას თქმით, საარჩევნო სისტემასთან დაკავშირებით კანონპროექტი "ქართულმა ოცნებამ" ხელოვნურად ჩააგდო.

"მოვედი იმისთვის, რომ არცერთი ხმა არ დაიკარგოს იმ საქმისთვის ხორცშესასხმელად, რომლის რეალიზების შანსი გაჩნდა მას შემდეგ, რაც ხელისუფლებამ პირდაპირი გაგებით ადამიანებს ხორცი ამოგლიჯა და თვალები დათხარა, მგონი არავის არ ჰქონდა უფლება ამ კენჭისყრაზე არ მოსულიყო და სწორედ ამას ემსახურება ჩემი აქ მოსვლა. ბოლო ერთი საათია თვალს ვადევნებთ უნიჭო სპექტაკლს, რომელიც გულისხმობს ამ ინიციატივის ჩაგდებას, არავის არ სჯერა იმისი, რომ ასე ბუნებრივად "ქართული ოცნების" ნაწილი ჩადგა რაზმში და ხელოვნურად იყვნენ აგრესიულები დილიდან. განსაკუთრებით გამოირჩეოდა ხუნდაძე, რომელმაც დააგვირგვინა მოთხოვნით, რომ გადაიდოს განხილვის საკითხი და ჩატარდეს უმრავლესობის სხდომა. მე პირადად საზოგადოებას არ მოვახვევ თავს, რომელსაც ისედაც არ სჯერა ხუნდაძის და დარწმუნებული ვარ, რომ ასრულებს ბატონი ივანიშვილის დავალებით. თუკი ამ პარლამენტში ვინმე გახლავთ, ოცნების დეპუტაციაში, ივანიშვილის უსიტყვოდ მორჩილებაში, გახლავთ ოჯახის პედიატრი ხუნდაძე. ეგ არ არის ის დეპუტატი, რომელიც ახმოვანებს თავის მოთხოვნებს. ამიტომ მოვუწოდებ ივანიშვილს გონიერებისკენ და ის შეთანხმება, რომელიც გაფორმდა საზოგადოებასთან 20 ივნისის მოვლენების შემდეგ, არ დაარღვიონ. წინააღმდეგ შემთხვევაში საზოგადოება მათ საკადრის პასუხს გასცემს. თუ როგორი იქნება ეს პასუხი ივანიშვილი იხილავს" - განაცხადა ნიკა მელიამ.