21-25 ოქტომბერს საქართველოს სოფლის მეურნეობის სამინისტროს დელეგაცია, სოფლის მეურნეობის მინისტრის შალვა ფიფიას ხელმძღვანელობით ისრაელში იმყოფება.

ვიზიტის ფარგლებში, ისრაელის საგარეო საქმეთა სამინისტროში შალვა ფიფიამ შეხვედრა გამართა  ისრაელის საერთაშორისო თანამშრომლობის პროგრამის (MASHAV) ხელმძღვანელთან  დანიელ კარმონსთან.

შეხვედრაზე მინისტრმა საქართველოში სოფლის მეურნეობის ხელშეწყობის მიმართულებით განხორციელებულ პროექტებზე ისაუბრა. მან აღნიშნა, რომ ახალი ხელისუფლებისთვის  სოფლის მეურნეობა რეალური პრიორიტეტი გახდა  და ერთი წლის განმავლობაში მასშტაბური და უპრეცედენტო პროექტები განხორციელდა. შალვა ფიფიამ დეტალურად ისაუბრა ,,მცირემიწიან ფერმერთა საგაზაფხულო სამუშაოების ხელშეწყობის პროექტზე“, ,,შეღავათიანი აგროკრედიტის პროექტზე“, ასევე სადრენაჟე და საირიგაციო სისტემების მოწესრიგების მიმართულებით ჩატარებულ სამუშაოებზე, სურსათის კონტროლის გამკაცრებულ მექანიზმებზე და ქართული პროდუქციის ექსპორტის ხელშეწყობაზე.

MASHAV-ის ხელმძღვანელი დანიელ კარმონსი  საქართველოში ახლადშექმნილი სოფლის მეურნეობის სამინისტროს რაიონული საინფორმაციო-საკონსულტაციო სამსახურების  საქმიანობით დაინტერესდა. დანიელ კარმონსმა  მზადყოფნა გამოთქვა  საქართველოში სხვადასხვა პროექტი განახორციელონ, მათ შორის საინფორმაციო-საკონსულტაციო სამსახურების თანამშრომელთა კვალიფიკაციის ამაღლების კუთხით. ებრაული მხარე მზადაა ქართველ ფერმერებს საკუთარი გამოცდილება გაუზიაროს.

ისრაელის საერთაშორისო თანამშრომლობის პროგრამა (MASHAV) 1958 წლიდან ფუნქციონირებს.  აღნიშნული პროგრამა საქართველოში ისრაელის საელჩოს გახსნის დღიდან  ამოქმედდა. მისი საქმიანობის ერთ-ერთი ძირითადი მიზანია, შესაძლებლობა მისცეს ქართველ სპეციალისტებს, კვალიფიკაცია აიმაღლონ ისრაელის წამყვან სასწავლო დაწესებულებებში და შეძენილი ცოდნა კოლეგებს გაუზიარონ. ეს კი, ქვეყნის განვითარების მიმართულებით კიდევ ერთი წინ გადადგმული ნაბიჯია.

ისრაელში ვიზიტის ფარგლებში, 22-24 ოქტომბერს სოფლის მეურნეობის მინისტრი შალვა ფიფია ქ.თელ-ავივში ისრაელის სავაჭრო ბაზრობებისა და გამოფენების ცენტრში WATEC-ის (წყლის ტექნოლოგიებისა და გარემოს კონტროლის გამოფენა-კონფერენცია) გამოფენას დაესწრება.