ახალგორის გამგებელი ნუგზარ თინიკაშვილი აცხადებს, რომ ოკუპირებულ ახალგორში ჭაში ჩავარდნის შედეგად დაშავებული საქართველოს მოქალაქე თამარ გიგაური სახლში ისე გაწერეს, რომ შესაბამისი სამედიცინო დახმარება არ გაუწიეს.

„სახლში გამოწერეს ისე, რომ თითქოს არანაირი პრობლემა არ აქვს. მისთვის არ გაუკეთებიათ არც ოპერაცია, არც თაბაშირში ჩაუსვამთ მოტეხილობა. შეხვეული მოტეხილობებით, დაბეჟილობებით, მძიმე მდგომარეობაში გადმოიყვანეს სახლში ახალგორში, თავისი დის, ნუნუ გიგაურის ოჯახში. ამ დროისათვის იგივე ვითარებაა, საზღვარს არ ხსნიან, რომ დაშავებული გადმოვიდეს და თბილისის კლინიკას მიმართოს. საზღვარი აუცილებლად უნდა გახსნან, რადგან ორ თვეზე მეტია, როგორც ქართველებისთვის, ისე ოსი მოსახლეობისთვის გაუსაძლისი პირობებია შექმნილი“, – განუცხადა საქართველოს პირველ არხს განაცხადა ნუგზარ თინიკაშვილმა.