"აბსურდი, ეკლესიის წინააღმდეგ მიმართული ქმედება... როგორც ვიცი, კალაძეს მოუნანიებია"- სექსუალურ ძალადობაში დადანაშაულებული მეუფე 30 წლის წინანდელ მოვლენებს იხსენებს

პოლიტიკა - 17:56, 06 Nov, 2019

1229

სექსუალურ ძალადობაში დადანაშაულებული მეუფე ზოსიმე მედიასთან დღეს პირველად გამოჩნდა და ჟურნალისტებთან ვრცელი განმარტება გააკეთა.
მაღალი იერარქი აცხადებს, რომ მისი მისამართით გაჟღერებული მძიმე ბრალდებები "აბსურდი, ანტიეკლესიური და ეკლესიის წინააღმდეგ მიმართული" ქმედებაა.

მიტროპოლიტმა პირდაპირ ეთერში თქვა, რომ მღვდელმთავარი, რომელიც ახლა მას ბრალდებებს უყენებს დიდიხანია ებრძვის.

"1988 წელს საქართველოში დიდი პოლიტიკური აშლილობა იყო. მთავრობის სასახლის წინ სულ მიტინგები ტარდებოდა. სტუდენტების ნაწილი, რომლებიც ახლა რაღაცეებს კადრულეობენ, განსაკუთრებით იღებდნენ ამ პროცესებში მონაწილეობას. როდესაც მოვთხოვეთ ძალიან მკაცრად სტუდენტებს მიეხედათ მეცადინეობისათვის, ამან ისეთი აზრი შექმნა ზოგიერთებში, თითქოს ჩვენ გულგრილობას ვიჩენდით ეროვნული მოძრაობის მიმართ. სასწავლებელში სულიერი ატმოსფერო მოიშალა. შემდეგ ეს დაძაბულობა მტრობაში გადაიზადა და რაც მოჰყვა, თქვენთვის ცნობილია. ჩემს მიმართ წაყენებული ბრალის მთავარი მიზეზი ესაა. ეს ახალგაზრდები თავიდანვე სხვა სულით გამოირჩეოდნენ, მათ პროტესტი ჰქონდათ ეკლესიის მიმართ, "- აცხადებს მეუფე ზოსიმე.

მისი თქმით, რამდენიმე დღის წინ გაჟღერებულმა ბრალდებამ შეძრა.

"მომასმენინეს და შევძრწუნდი ისეთი რაღაცები მოვისმინე. ესენი რაღაც ძალების წაქეზებით მოქმედებენ"- თქვა სასულიერო პირმა.

წილკნისა და დუშეთის ეპარქიის მიტროპოლიტი კიდევ ერთხელ ამბობს, რომ ადამიანები, რომლებიც მას სექსუალურ ძალადობაში ადანაშაულებენ „სხვა სულით გამოირჩეოდნენ“.

"ვერცერთს მოიძიებენ, რომ მსგავსი ბრალი დაამოწმოს ვინმემ... მე როგორც ვიცი, კალაძეს მოუნანიებია"- თქვა მეუფე ზოსიმემ.

წილკნისა და დუშეთის ეპარქიის მიტროპოლიტი 30 წლის წინანდელ მოვლენებს კიდევ ერთხელ იხსენებს და ამბობს:

„არც მინდა იმის გახსენება. წარმოიდგინეთ სტუდენტები ლექტორის კაბინეტში რომ შევარდებიან, ისეთი შფოთი და დაძაბულობები შეიქმნა, ერთსღა ვფიქრობდი, როგორმე დაძაბულობა ჩამეცხრო. მე ვუთხარი, დამშვიდდით შვილო, დაწყნარდით. ეს სხვა სულის ხალხი იყო აბსოლუტურად, ეკლესიის მორჩილება კი არა, ეკლესიის დამორჩილება სურდათ იმ ხალხს, ვინც ამათ უკან იდგა.ზუსტად ვერ გეტყვით, ამ ხალხის უკან ვინ იდგა. საეროს არ დავასახელებ, მაგრამ სასულიერო, ყოფილი მღვდელმთავარი ქრისტეფორე წამალაიძე რომ იყო, ის ადრევე დაუპირისპირდა ეკლესიას, ადრევე მოხვდა დაპირისპირებაში და ეს იმის ხალხია. თავიდანვე შევამჩნიე ეს უცხო სული, ამათ შფოთი, არეულობა და დაძაბულობა უნდოდათ ეკლესიაში“, - განაცხადა მეუფე ზოსიმემ.