"ბაჩანა შენგელია საქართველოს წინააღმდეგ" - ასეთი სახელწოდების სარჩელი დარეგისტრირდა ევროსასამართლოში, სტრასბურგში. სარჩელი იმ პედაგოგის შვილმა მოამზადა, რომელიც, მისი თქმით,"ოცნების ხელისუფლებას" შეეწირა.

შეგახსენებთ, რომ ზუგდიდელი პედაგოგი და სკოლის დირექტორი ია კერზაია მას შემდეგ გარდაიცვალა, რაც მის წინააღმდეგ თბილისში გაგზავნილი ანონიმური წერილების საფუძველზე შესაბამისი ორგანოები სკოლის ბიუჯეტით დაინტერესდნენ. მანამდე ია კერზაიამ უარი თქვა მმაღთველი პარტიის წინასაარჩევნო დავალებების შესრულებაზე, რასაც მის წინააღმდეგ დაგეგმილი თავდასხმები მოჰყვა.

ია კერზაიას შვილი, ბაჩანა შენგელია წერს:

"არც ერთი ინსტანცია, არც ერთი მინიმალური შანსი არ დაგვიტოვებია მტკიცებულებების მოსაპოვებლად, საქმეზე სიმართლის დასადგენად. საპასუხოდ ყველა სახელმწიფო უწყებიდან ვიღებდით საქმის გაყალბების ხელშეწყობას, მოწმეებზე ზეწოლას, ტყუილებს, ცინიზმს, არაკომპეტენტურობას. ყველა სახელმწიფო ინსტიტუტი შეთანხმებულად მოქმედებდა საქმის გამოძიების შესაწყვეტად, ფაქტების დასამახინჯებლად.

ერთი წლის განმავლობაში, ჩემი მეგობრების დახმარებით, პრაქტიკულად შიშველი ხელებით, მედიის და არასამთავრობო ორგანიზაციების ხელშეწყობით, ლამის სისხლის ფასად ვცდილობთ საქმის მასალების მოპოვებას და სწორედ ასე მოპოვებული მასალები გავაგზავნეთ სტრასბუგრში. ახლა ბოლო სიტყვა ევროპიდან უნდა გავიგოთ, სადაც იმედი მაქვს არ ეცდება ჩვენი მთავრობა თავისი საცეცების მიწვდენას.

ჩვენ დღეს სახელმწიფო არ გვაქვს, ჩვენ გვაქვს ძალადობრივი რეჟიმი, რომლის მთავარი ამოცანა არის საკუთარი არსებობის გახანგრძლივება. სწორედ ამ რეჟიმის წინააღმდეგ არის ეს სარჩელი. საქართველოს წინააღმდეგ ბაჩანა შენგელია არასოდეს იქნება, მით უმეტეს ია კერზაია, რომელიც ზუსტადაც ქვეყნის სიყვარულს და თავისუფლებისთვის ბრძოლას შეეწირა.

მადლობა ყველას, ბრძოლას ყოველთვის აქვს აზრი!" - წერს ბაჩანა შენგელია სოციალურ ქსელში.