სახალხო დამცველი ნინო ლომჯარია სოფიო კილაძეს სოლიდარობას უცხადებს. მისი თქმით, რთულია ძალადობაზე საუბარი მით უფრო, როდესაც პოლიტიკოსი ხარ და ეს ძალიან დიდ გამბედაობას მოითხოვს.

"ქალმა საჯაროდ ისაუბროს მის მიმართ ჩადენილ ძალადობაზე ჩვენ საზოგადოებაში ძალიან, ძალიან რთულია, ხოლო საჯარო პირმა, პოლიტიკოსმა და ცნობადმა სახემ - 10 000-ჯერ უფრო რთული და ძალიან დიდ გამბედაობას მოითხოვს. ოჯახში ძალადობას არა აქვს სოციალური სტატუსი, ასაკი, რელიგია, მისი მსხვერპლი შეიძლება გახდეს ყველა. სირცხვილი არ არის იყო მსხვერპლი, არც მსხვერპლის "ბრალია" იყოს მსხვერპლი. სახელმწიფო იმიტომ არსებობს, რომ უნდა დაგვიცვას ასეთ ვითარებაში, საზოგადოება გვერდით უნდა დაუდგეს მათ. ყველა ქალმა უნდა ამოიღოს ხმა ძალადობის დროს და მისცეს სხვებს მაგალითი!" - წერს ლომჯარია სოციალურ ქსელში.

გავრცელებული ინფორმაციით, "ქართული ოცნების" დეპუტატი ყოფილი მეუღლისგან ფსიქოლოგიური ძალადობის მსხვერპლი გახდა, რასაც თავად დეპუტატიც ადასტურებს და აცხადებს, რომ მის მიმართ შემაკავებელი ორდერი უკვე გაცემულია.