რატომ არ ესწრება სინოდის დღევანდელ სხდომას მეუფე გრიგოლი - ფოთისა და ხობის მიტროპოლიტის განმარტება

პოლიტიკა - 13:07, 31 Oct, 2019

1612

ფოთისა და ხობის მიტროპოლიტი, მეუფე გრიგოლი სინოდის დღევანდელ სხდომას არ ესწრება

მეუფე გრიგოლი სინოდის მსხდომაზე არყოფნას განმარტავს და აცხადებს, რომ მას სტუმრად ჰყავს მსოფლიოს საპატრიარქოს წარმომადგენელი, რომლის დატოვებაც შეუძლებელი იყო.

"მსოფლიო საპატრიარქოს წარმომადგენელი გვყავს სტუმრად ახალი საქართველოს უნივერსიტეტში. ეს ღონისძიება დაგეგმილი იყო წლის დასაწყისიდან, იანვრიდან. ხვალ მიემგზავრება ჩვენი სტუმარი და შეუძლებელი იყო ჩემი მხრიდან დატოვება. თუმცა, ჩემი არყოფნა ვფიქრობ, მნიშვნელოვან გავლენას ვერ იქონიებს სინოდის გადაწყვეტილებებზე, რაც მსჯელობის საგანი იქნება და მიიღება საბოლოო ჯამში“, - განაცხადა მეუფე გრიგოლმა.

მეუფე გრიგოლის განცხადებით, საეკლესიო დებულების თანახმად, მან წერილობით მიმართა წმინდა სინოდის თავმჯდომარეს და მიუთითა მისი არყოფნის მიზეზი.

"ეს არის მეორე შემთხვევა, როდესაც სინოდის სხდომას არ ვესწრები ამ 24 წლის განმავლობაში. ერთხელ, როდესაც არ ვიმყოფებოდი საქართველოში და ახლა მეორედ, როცა მნიშვნელოვანი ღონისძიება ტარდება და თავისთავად ცხადია, ეს არის მიზეზი ჩემი არ დასწრების. თუმცა ვფიქრობ, რომ სინოდი მაქსიმალური შემადგენლობით არის შეკრებილი და იმსჯელებენ ალბათ იმ საკითხებზე, რასაც მისი უწმინდესობა დააყენებს დღის წესრიგში" - ამბობს მეუფე.