ევროპის საბჭოს ადგილობრივ და რეგიონალურ თვითმმართველობათა კონგრესი 29-31 ოქტომბერს სტრასბურგში იმართება. პოლიტიკოსების გარდა კონგრესს ასევე ქვენყნის ახალგაზრდა დელეგატებიც ესწრებიან.

კონგრესზე ევროპაში მყოფ ლტოლვილებთან დაკავშირებით მომზადებული რეზოლუცია განიხილებოდა, რომლის დროსაც რუსეთის დელეგაციის წევრმა, ერთ-ერთი ქალაქის მერმა, უკმაყოფილება გამოთქვა რეზოლუციის რამდენიმე მუხლთან დაკავშირებით და თავის გამოსვლაში დაადანაშაულა საქართველო 2008 წლის ომის დაწყებაში.

საქართველოს ახალგაზრდა დელეგატმა, კოკა კაპანაძემ შეეპასუხა მის წინა გამომსვლელს და კიდევ ერთხელ შეახსენა დამსწრე საზოგადოებას თუ რომ რუსეთი ოკუპანტია.

“სანამ ჩვენს რეკომენდაციებს წარმოვადგენდე, არ შემიძლია არ გავაკეთო კომენტარი რუსეთის დელეგაციის წევრის სიტყვაზე. მიუღებელია მსგავსი ტყუილების მოსმენა ყირიმში და ცხინვალის რეგიონში მომხდარ კონფლიქტებთან დაკავშირებით. დარწმუნებული ვარ ამ დარბაზში დამსწრე საზოგადოებამ კარგად იცის რომ რუსეთი არის აგრესორი და ის ვინც უნდა დავადანაშაულოთ ამ კონფლიქტებში.”, თქვა კოკა კაპანაძემ და შემდეგ განაგრძო ახალგაზრდა დელეგატების მიერ შემუშავებული რეკომენდაციების წარდგენა, რომლებიც ეხებოდა განათლების უფლებასა და ჯანდაცვის სერვისებს.

კოკა კაპანაძე ედინბურგის უნივერსიტეტის მაგისტრატურის სტუდენტია. შოტლანდიაში გამგზავრებამდე ის მუშაობდა საქართველოს პარლამენტში ორი წლის განმავლობაში და ხელმძღვანელობდა არაერთ ახალგაზრდულ ორგანიზაციას. კონგრესი არის ევროპის საბჭოს პლატფორმა ადგილობრივი და რეგიონალური დონის პოლიტიკოსებისთვის, რომელზეც განიხილება თუ როგორ შეიძლება ადამიანის უფლებებისა და დემოკრატიის გაუმჯობესება თვითმმართველობების დონეზე.