„ევროპული საქართველოს“ ლიდერი დავით ბაქრაძე მნიშვნელოვანს უწოდებს საქართველოში შეერთებული შტატების ელჩობის კანდიდატი კელი დეგნანის გზავნილებს, რომელიც დიპლომატმა სენატში მოსმენისას გააჟღერა.

"ელჩობის კანდიდატმა პირველივე საჯარო მოსმენაზე დასვა აბსოლუტურად მართალი და სწორი 3 აქცენტი. ეს არის ის პრიორიტეტები, რომელიც ამერიკას ექნება საქართველოში: საქართველოს უსაფრთხოების დაცვა და რუსული აგრესიის შეკავება, საქართველოს ნატო-ში გაწევრიანების მხარდაჭერა და ქვეყნის შიდა დემოკრატიის მხარდაჭერა, მათ შორის თავისუფალი და დემოკრატიული არჩევნების ჩატარება. ეს უმნიშვნელოვანესი მესიჯია. ის ფაქტი, რომ შეერთებული შტატების მხრიდან საქართველოში თავისუფალი არჩევნების ჩატარება ფასდება ისეთივე პრიორიტეტულდ, როგორიც არის ნატო-ში გაწევრიანება და ქვეყნის უსაფრთხოების დაცვა, მხოლოდ ერთს ნიშნავს - ამერიკის ახალი ელჩი საქართველოში მკაფიო მანდატით ჩამოდის. სენატის მანდატი გულისხმობს იმას, რომ ამ ქვეყანაში უნდა ჩატარდეს თავისუფალი და დემოკრატიული არჩევნები და ჩვენი პარტნიორების აქტიური ჩარევა ამ პროცესში შეიძლება აღმოჩნდეს მართლაც გარდამტეხი იმისთვის, რომ ხელისუფლებამ ვეღარ შეძლოს 2020 წლის არჩევნების გაყალბება. ეს, პროპორციულ სისტემასთან ერთად გადამწყვეტი ფაქტორი იქნება საქართველოში ხელისუფლების შესაცვლელად. ამიტომ, ძალიან მნიშვნელოვანია, რომ პირველივე გამოსვლაში სამ მთავარ პრიორიტეტში მომავალმა ელჩმა დაასახელა თავისუფალი არჩევნების ჩატარება. ამის მანდატი სენატისგან მიიღო და საქართველოში სწორედ ამ მანდატის და ამ მისიის განსახორციელებლდ ჩამოდის“, - განაცხადა ბაქრაძემ.