ატოცში ღამის საათებში ათი ნიღბიანი, ცხენოსანი ოკუპანტი გადაადგილდებოდა, პოლიციამ სოფელში ქაცარავა და მისი გუნდი არ შეუშვა

პოლიტიკა - 12:16, 30 Oct, 2019

1406

ანტიოკუპაციური მოძრაობა "ძალა ერთობაშიას" ლიდერი დავით ქაცარავა და ორგანიზაციის წევრები, რომლებიც 2017 წლის ივლისიდან შიდა ქართლის საოკუპაციო ზოლზე სამოქალაქო პატრულირებას ეწევიან, გვიან ღამით პოლიციამ ატოცის მიმართულებით არ გაატარა.

სახლი, სადაც აქტივისტები ატოცში ცხოვრობდნენ და ერთმანეთს ენაცვლებოდნენ, ამჟამად ცარიელია - აქტივისტებს ამ დრომდე არა აქვთ იქ მისვლის შესაძლებლობა.

შეზღუდვა დაწესებულია იმ ფონზე, როცა ატოცელებმა გუშინ, დაახლოებით ღამის ორ საათზე, სოფლის ბოლოს ათამდე შეიარაღებული, ნიღბიანი ოკუპანტი შენიშნეს.

"ცხენოსნები საოკუპაციო ზოლისგან მოშორებით, დაახლოებით ერთი კილომეტრის სიღრმეში გადაადგილდებოდნენ, შემდეგ სოფელ ქვემო ოქონისკენ გაბრუნდნენ, სადაც მათი ბლოკ-პოსტია განთავსებული", - უთხრა "ნიუპოსტს" ატოცელმა კ.მ.-მ. მისივე თქმით, ოკუპანტები ქართველმა პოლიციელებმაც შენიშნეს, მაგრამ მათი გადაადგილებისთვის ხელი არ შეუშლიათ.

შეგახსენებთ, ატოცის მიმართულებით ღამის ორ საათზე შევიდნენ ევროკავშირის სადამკვირვებლო მისიის წარმომადგენლებიც. საავარაუდოდ, მისია ცხელი ხაზის მეშვეობით საქმის კურსში ჩააყენეს, რომ ოკუპანტებმა მათ მიერვე დადგენილი ზოლი დაარღვიეს. დამკვირვებლები უკან 05:15 საათზე გამობრუნდნენ და გორისკენ გაემართნენ.