საქართველოში განხორციელებულ კიბერშეტევას BBC გამოეხმაურა- ჰაკერული თავდასხმის გამო, გუშინ დღის განმავლობაში საქართველოში 2000-მდე ვებგვერდი გათიშული იყო. აღნიშნულ საიტებზე გადასვლისას მიხეილ სააკაშვილის ფოტო ჩნდებოდა წარწერით "I'LL BE BACK" (მე დავბრუნდები). ამ დრომდე უცნობია ის წყარო, რომლისგანაც ხორციელდებოდა კიბერშეტევა.

BBC-ის კავკასიის კორესპონდენტის, რეიჰან დემიტრის განცხადებით, სოციალური ქსელების ქართველი მომხმარებლები წერენ, რომ შეტევის უკან რუსული კვალია. რეიჰანს ქართველმა კიბერ უსაფრთხოების ექსპერტებმა განუცხადეს, რომ საქართველოს მთავრობის ოფიციალური ვებ გვერდები არ არის კარგად დაცული, რის გამოც მარტივად მიიტანეს მათზე შეტევა.

შინაგან საქმეთა სამინისტროს ინფორმაციით, სხვადასხვა ქართულ ვებგვერდზე უნებართვო შეღწევისა და მონაცემების უნებართვო შეცვლის ფაქტზე გამოძიება სისხლის სამართლის კოდექსის 284-ე მუხლის 1-ლი ნაწილით და 286-ე მუხლის 1-ლი ნაწილით მიმდინარეობს. უწყებისვე ცნობით, მიმდინარეობს ყველა იმ პირის გამოკითხვა, ვინც შესაძლოა, გამოძიებისთვის მნიშვნელოვან ინფორმაციას ფლობდეს, ასევე, ტარდება ტექნიკური მოწყობილობების დათვალიერება. დანიშნულია შესაბამისი ექსპერტიზები.

ბოლო მონაცემებით, ჰაკერული თავდასხმა განხორციელდა, საქართველოს პრეზიდენტის, საერთო სასამართლოებისა, თბილისის სააპელაციო სასმართლოს, ზუგდიდის რაიონული სასამართლოს, ბათუმის მერიის, ქუთაისის მერიის, მედიასაშუალება topnews.com.ge-ს, არასამთავრობო ორგანიზაცია “მედიის განვითარების ფონდის" და "საზოგადოება და ბანკების" ვებგვერდებზე.

კიბერშეტევა განხორციელდა ასევე ქართული ტელეკომპანიების, იმედისა და მაესტროს სერვერებზეც.