ვაშაძე: სტრატეგია აღმაშენებლის „ჯანდაცვის ქართული მოდელის“ პრეზენტაცია დღეს მინისტრმა ტიკარაძემ გაიმეორა

პოლიტიკა - 21:16, 28 Oct, 2019

665

„სტრატეგია აღმაშენებლის“ ლიდერი გიორგი ვაშაძე ჯანდაცვის მინისტრის ინიციატივას ეხმაურება.
მისი თქმით, ფაქტიურად"სტრატეგია აღმაშენებელმა" 16 ოქტომბერს გავაჟღერა, დღეს ეკატერინე ტიკარაძემ გაიმეორა.

"მსურს გამოვეხმაურო ჯანდაცვის მინისტრის დღეს გაჟღერებულ ინიციატივებს.

პირველ რიგში, აღსანიშნავია, რომ სტრატეგია აღმაშენებლის „ჯანდაცვის ქართული მოდელის“ პრეზენტაციას ასე მოკლე დროში მოყვა გამოხმაურება ჯანდაცვის სამინისტროს მხრიდან. ფაქტიურად, ყველა პრიორიტეტი და მიმართულება, რრომელიც ჩვენ 16 ოქტომბერს გავაჟღერეთ, დღეს ქალბატონმა მინისტრმა გაიმეორა. ასევე აღსანიშნავია, რომ ჩვენი პრეზენტაციის ტექსტიც და სტილისტიკა, რომელიც საიტზეც განვათავსეთ, კარგად შეუსწავლია მინისტრს და გამოიყენა კიდეც. სწორედ ეს არის სტრატეგია აღმაშენებლის მიზანი, რომ ერთი მხრივ, ვაიძულოთ ხელისუფლება გადადგას ეფექტური ნაბიჯები და მეორე მხრივ, მოვამზადოთ საფუძველი შემდგომი რეფორმებისთვის საზოგადოების, პოლიტიკური და ექსპერტული წრეების ფართო ჩართულობით.

მინისტრმა ზედმიწევნით გაიმეორა ჯანდაცვაში არსებული პრობლემები, თუმცა არ დაუკონკრეტებია გადაჭრის გზები. რადგანაც მან საფუძვლიანად იხელმძღვანელა სტრატეგია აღმაშენებლის „ჯანდაცვის ქართული მოდელის“ კონცეფციით, მას ასევე შეუძლია გაეცნოს ჩვენს მიერ შეთავაზებულ პრობლემის გადაწყვეტის მექანიზმებსაც. თუმცა, ეჭვი მეპარება, რომ ხელისუფლებამ შეძლოს რაიმე ღირებულის შექმნა, ან რეალური რეფორმის გატარება ჯანდაცვის მიმართულებით, რადგანაც 2014 წლიდან ყოველ წელს, ხელისუფლება აჟღერებს რომ მათთვის პრიორიტეტია წამლების ფასი და ხარისხი, პირველადი ჯანდაცვა ან ციფრული მედიცინა. როგორც ვხედავთ ამ მიმართულებებით დღემდე დიდი ჩავარდნებია და რეალური ნაბიჯები არ გადადგმულა. ასევე, არ მგონია, რომ ქალბატონი მინისტრი ან ქართული ოცნების ხელისუფლება დაუპირისპირდეს სააფთიაქო მაფიასა და ვერტიკალურ მონოპოლიებს და წავიდნენ კარტელური გარიგეგების წინააღმდეგ. ამის დროც და საშულებაც მათ ქონდათ, მაგრამ არ გააკეთეს. ასე, რომ ეს არის მორიგი პოპულისტური განცხადებები და ასევე მცდელობა, რომ როგორმე რეაგირება მოეხდინათ ჩვენ მიერ შეთავაზებულ ინიციატივებზე.

სტრატეგია აღმაშენებელს ყველა იმ მიმართულებაზე რაზეც მინისტრმა დღეს ისაუბრა აქვს კონკრეტული, შეიძლება ითქვას რევოლუციური გეგმა და გადაწყვეტის „ფორმულები“. ასევე, ვამუშავებთ დეტალურ გეგმებს სამედიცინო განათლებასთან, სადაზღვევო სისტემებთან დაკავშირებით და კიდევ ბევრ სიახლეს შევთავაზებთ ჩვენ თანამოქალაქეებს"- აცხადებს ვაშაძე.