"ბავშვების სიცოცხლის მუქარაზე გადავიდნენ... ვასაძე დანაშაულში მეუფე დიმიტრისა და სოსო ოხანაშვილის მონაწილეობის აღიარებას მთხოვდა"- დეკანოზის სკანდალური წერილი

პოლიტიკა - 11:37, 28 Oct, 2019

7759

ე.წ. ციანიდის საქმეზე მსჯავრდებული დეკანოზი, მამა გიორგი მამალაძე "ტვ. პირველისთვის" გამოგზავნილ სკანდალურ წერილში მთავარი პროკურორის მოადგილეს მამუკა ვასაძეს უმძიმეს ბრალდებებს უყენებს.

სასულიერო პირი ირწმუნება, რომ სწორედ ვასაძეა ის პირი, რომელიც მას არარსებული დანაშაულის აღიარებას "საკუთარი ხელის ბიჭების" საშუალებით აიძულებდა. წერილის ავტორის თქმით, მისი დაკავებით საპატრიარქოს სოსო ოხანაშვილი ჩამოაშორეს და ასევე მეუფე დიმიტრი, პატრიარქობის ერთ-ერთი კანდიდატი გაანეიტრალეს.

მსჯავრდებული აცხადებს, რომ ის ფარდას ახდის ყველაფერს, რაც საპატრიარქოში ხდება. მამა გიორგი მამალაძე აცხადებს, რომ მისი დაკავების მიზეზი სწორედ იმ პრობლემების დალაგების თხოვნა იყო, რაც ხდებოდა საპატრიარქოში.

"გავრცელდა პროკურორის მამხილებელი წერილი, რომელმაც კიდევ ერთხელ დაადასტურა პროკურატურის მიერ დაკვეთილი საქმეების შეკერვა, რასაც მე 2017 წლიდან გავიძახი, სწორედ საქმეების შემკერი ლიდერი პროკურორი, მამუკა ვასაძე გაჰყავთ ახლა უზენაესი სასამართლოს მოსამართლედ, ვასაძე, რომელიც არარსებული დანაშაულის აღიარებას მაიძულებდა და ამ დანაშაულში მეუფე დიმიტრისა და სოსო იხანაშვილის მონაწილეობის აღიარებას მთხოვდა. ეს ის ვასაძეა, რომელმაც არ იცის, რა არის პატივი და ღირსება, დარწმუნებული ვარ, ბატონმა ვასაძემ, არც მორალი და ეთიკა იცის, რადგან თავისი ხელის ბიჭების მეშვეობით, ზემოთჩამოთვლილი მოთხოვნების გარდა, სხვა საუბარსა და აღიარებებს მთხოვდნენ. ჩემი ძმა გყავდათ ეთერში, რომელიც ამბობდა, რომ სინოდის სხდომის მეორე დღესვე იტყოდა უმთავრესს ანუ ფარდას ახდის ყველაფერს, სწორედ ეს არის ყველაზე მძიმე ჩემთვის. ეს იმდენად მძიმე იქნება ეკლესიისთვის და ზოგადად ქვეყნისთვის, რომ საფიქრალი მემატება და სადარდებელი. მე არ მსურდა ამ თემაზე საუბარი პატიმრობაში მყოფს, მაგრამ სწორედ თავისუფლებაზე ყოფნისას, როცა ვითხოვდი ამ უმძიმესი საკითხების მოგვარებას ეკლესიის შიგნით, სწორედ ეს გახდა უმთავრესი მიზეზი ჩემი პატიმრობისა, რომლითაც დამატებით მოახერხეს სოსო ოხანაშვილის ჩამოშორება საპატრიარქოდან და მეუფე დიმიტრის, როგორც საპატრიარქო კანდიდატის განეიტრალება“- ნათქვამია წერილში, რომელიც დეკანოზმა საპატიმროდან გამოგზავნა.

მსჯავრდებული დეკანოზი ამბობს, რომ მას ბოლო ორი წელია ლიკვიდაციის შიშში ამყოფებენ. სასულიერო პირის განცხადებით, მას შვილების ლიკვიდაციითა და ძმის, თორნიკე მამალაძის დაკავებით ემუქრებიან.

„მე ორი წელი და რვა თვეა ლიკვიდაციის შიშში მაცხოვრებენ. ამით რომ ვერ შემაშინეს, ბავშვების სიცოცხლის მუქარაზე და თორნიკეს დაკავების მუქარაზე გადავიდნენ, თუმცა ავიწყდებათ, რომ არაფერი იმალება. მე ქრისტესთვის და ეკლესიის სიწმინდისთვის სოცოცხლეც კი არ მენანება“- აცხადებს დეკანოზი მამალაძე.