ერთიანმა ნაციონალურმა მოძრაობამ 2020 წლის საპარლამენტო არჩევნებისთვის მზადება დაიწყო და ყოველდღიურად პარტიის ლიდერები რეგიონში შეხვედრებს მართავენ.

ენმ-ის თავმჯდომარე გრიგოლ ვაშაძე და რეგიონალური სამსახურის ხელმძღვანელი დავით კირკიტაძე ზესტაფონის რაიონული ორგანიზაციის წევრებს შეხვდნენ, შემდეგ კი სოფელ პირველ სვირს ესტუმრნენ.

ოფისში შეხვედრაზე ადგილობრივების პრობლემები განიხილეს და წინასაარჩევნო კამპანიის დაგეგმვა დაიწყეს.

სოფელ პირველ სვირში წყალი არ არის, მაცხოვრებლების თქმით წყლის ყიდვა უწევთ და ისედაც გაჭირვებული მოსახლეობის მდგომარეობას ეს უფრო ამძიმებს. ასევე სოფელს მოწესრიგებული გზა არ აქვს. ხელისუფლებას მხოლოდ წინასაარჩევნოდ ახსენდება პირველი სვირი, დაპირებებს გასცემს, რის მიხედვითაც წყლისა და გზის პრობლემა უნდა მოწესრიგებულიყო, თუმცა არჩევნების შემდეგ დაპირებად დარჩა და აქ მუნიციპალიტეტის წარმომადგენელი არავის უნახავს.

პარტიის ლიდერებმა სამომავლო გეგმები გააცნეს და არჩევნების შემდეგ დახმარებას დაჰპირდნენ.