"ატოცის პოლიციის ისედაც მწირი კონტინგენტიდან, მინიმუმ, ხუთი ჩვენ გვდარაჯობს"

"ატოცის პოლიციის ისედაც მწირი კონტინგენტიდან, მინიმუმ, ხუთი ჩვენ გვდარაჯობს" - ანტიოკუპაციური მოძრაობა

პოლიტიკა - 14:53, 24 Oct, 2019

996

ქარელის რაიონის სოფელ შაქშაქეთის პოლიციის საგუშაგოდან ატოცის მიმართულებით ისევ არ უშვებენ ჟურნალისტებს, ხოლო ანტიოკუპაციური მოძრაობის წევრებს, რომელთა ნაწილი ატოცშია და იქედან არ გამოდის, პოლიცია საათობით ალოდინებს, სანამ ატოცში შესვლის უფლებას მისცემს.

ამავე დროს, ანტიოკუპაციური მოძრაობის წარმომადგენლებს პოლიცია ატოცშიც უკრძალავს გადაადგილებას, ხოლო საოკუპაციო ხაზის სიახლოვეს საერთოს აღარ უშვებს.

ამის შესახებ "ფეისბუქში" მოძრაობის დამფუძნებელი და ლიდერი დავით ქაცარავა და დირექტორი, ჟურნალისტი ლაშა ბერულავა წერენ. ლაშა ბერულავამ ატოციდან მიღებული ფოტოები გამოაქვეყნა.

ჟურნალისტი წერს, რომ ატოცის პოლიციის ისედაც მწირი კინტინგენტის ხუთკაციანი ჯგუფი მათ თვალთვალსა და ადევნებაზე ცდება.

"ატოცში პოლიცია ისევ ჩვენთვის გზის გადაღობვითაა დაკავებული.საპატრულო ჯგუფის წევრებს ველზე არ უშვებენ და სახლიდან გამოსვლას უზღუდავენ.პურზე გავლენ, წყალზე თუ ტუალეტში, ყველგან ფეხდაფეხ დაჰყვებიან.აქედან ფეხით წასვლაც სცადეს - ამ შემთხვევაში გზის გადაჭრა სხვა პოლიციელებს, უკვე ქვეითებს აქვთ დავალებული.

მოკლედ რომ ვთქვათ, ატოცის პოლიციის ისედაც მწირი კონტინგენტიდან, მინიმუმ, 5 პოლიციელი სადღეღამისო რეჟიმში ჩვენი გადაადგილების კონტროლითაა დაკავებული და აი, ასე იხარჯება სახელმწიფო რესურსი", - წერს ბერულავა, ხოლო დათო ქაცარავა, უწოდებს რა ხელისუფლებას კოლაბორაციონისტსა და გამყიდველს, წერს, რომ სამოქალაქო პატრულირების ჩაშლა შეუძლებელია:

"ხელისუფლება აგრძელებს ოკუპანტის დაკრულზე ცეკვას.მას შემდეგ, რაც ხელისუფლებამ მაქსიმალური ძალისხმევა იხმარა იმისათვის, რომ ოკუპანტებისთვის კომფორტული გარემო შეექმნა ატოცში საოკუპაციო ხაზზე ღობეების დასამონტაჟებლად, იმ დღის შემდეგ გააგრძელა ანტისაოკუპაციო მოძრაობის წევრების შეზღუდვა გადაადგილებაში.შეგახსენებთ, როდესაც ოკუპანტები გამოჩნდნენ ატოცში და გააგრძელეს საოკუპაციო ხაზის ბადეებით "შეფუთვა", პოლიციამ ყველაფერი გააკეთა, რომ ჩვენ ახლოსაც არ გავკარებოდით რუს ოკუპანტებს.
არ უშვებდნენ ჟურნალისტებს დაამ დღის შემდეგ აღარც ჩვენ გვიშვებენ საოკუპაციო ხაზთან პატრულირებაზე და ამიტომ გვიწევს სხვადასხვა მოწყობილობებით ატოციდან, საოკუპაციო ხაზიდან მოშორებით სიტუაციაზე დაკვირვება.ასევე, გვაჩერებენ საათობით შაქშაქეთის პოსტზე და გვაფერხებენ ატოცში გადაადგილებისას.24 საათი გვიდგას ყარაული სახლთან, პურის საყიდლად რომ გავდივართ სახლიდან, სანამ "უფროსობასთან" არ შეთანხმდება ჩვენი გამოსვლა, არ გვიშვებენ.თუ ფიქრობთ, რომ ამგვარი ქმედებით შედეგს მიაღწევთ და გვაიძულებთ დავასრულოთ პატრულირება, ცდებით.

ჩვენ გავაგრძელებთ თქვენს ლუსტრაციას. ჩვენ არ მოგცემთ უფლებას, ჩუმად გადასცეთ რუსებს ტერიტორიები, როგორც ეს წაღვლი-ჩორჩანის ტყის შემთხვევაში გააკეთეთ.ჩვენი მთავრობა კოლაბორაციონისტი და კაპიტულანტია.ეს ფაქტია.
ამგვარი ქმედებით თქვენ მხოლოდ კიდევ ერთხელ გვარწმუნებთ იმაში, რომ დაკავებული ხართ ამ ქვეყნის რუსებისთვის გადაცემით.ჩვენ არ დავნებდებით და ამ ქვეყნის რუსებისთვის გაყიდვის უფლებას არ მოგცემთ.ძალა ერთობაშია!ბრძოლას ყოველთვის აქვს აზრი! " წერს დავით ქაცარავა.