მოზარდების მკვლელობის საქმე - მიხეილ კალანდია პროცესების გასაჯაროებას ითხოვს

პოლიტიკა - 10:09, 24 Oct, 2019

1149

ხორავას ქუჩაზე მომხდარი სასტიკი მკვლელობის საქმე - დღევანდელ სასამართლო პროცესზე ბრალდების მხარის კიდევ 4 მოწმე დაკითხეს.

მიხეილ კალანდიას ადვოკატმა კი გენერალურ პროკურორს მიმართა და სხდომების გასაჯაროება მოითხოვა.

რაც შეეხება უშუალოდ დღევანდელ პროცესს საქმის პროკურორის თქმით, საკითხულმა არასრულწლოვანმა დაადასტურა, რომ იმყოფებოდა ხორავას ქუჩა 4-ის არკაში, თუმცა ის ეზოს სიღრმეში არ შესულა.

"შესაბამისად ვერ დაადასტურებდა იმ ინფორმაციას, რა ხდებოდა ხორავას ქუჩაზე. პროცესის გახსნის შუამდგომლობა დღეს არ გაჟღერებულა, როგორც ჩემთვის გახდა ცნობილი, აღნიშნული შუამდგომლობით მიმართეს ბრალდების მხარეს, თუმცა ჩვენამდე ეს შუამდგომლობა არ მოსულა," - განაცხადა საქმის პროკურორმა.

როგორც მიხეილ კალანდიას ადვოკატი ზურაბ თოდუა აღნიშნავს, გენერალურ პროკურორს შუამდგომლობა წაკითხული არ აქვს.

"გენერალურ პროკურორს არ აქვს წაკითხული ჩემი შუამდგომლობა სხდომის გასაჯაროებასთან დაკავშირებით. შესაძლოა დაკავებული იყო და კითხულობს კონსტანტინე გამსახურდიას დიდოსტატის მარჯვენას და ვერ გამონახა დრო. ოთხი დაკითხული მოწმიდან არცერთი დაკითხული არ იძლევა ინფორმაციას, რომ მიხეილ კალანდიამ ჩაიდინა შერაცხული ბრალით გათვალისწინებული დანაშაული, " - განაცხადა კალანდიას ადვოკატმა ზურაბ თოდუამ.